Gent Sherifi ishte një emër që ekzistonte deri pak kohë më parë në listën e të kërkuarve të policisë shqiptare, pasi ishte i dyshuari kryesor dhe i dënuar në mungesë për vrasjen e një njeriu dhe plagosjen e një tjetri, në trazirat e vitit 1997 në Tiranë.
Vetëm kohët e fundit hetimet nga shërbimi i bashkëpunimit ndërkombëtar të policisë kriminale, kanë bërë që hetuesit të ndezin dritën jeshile për gjetjen e të dyshuarit në Itali e pikërisht në Torino.
Dhe dyshimet rezultuan të ishin të vërteta. Ishte pikërisht kështu. Gent Sherifi, 47 vjeç, i dënuar me 13 vjet, 5 muaj e 3 ditë për atë vrasje të vjetër më 26 korrik 2014 nga gjykata e Tiranës, fshihej prej më shumë se 20 vitesh në lagjen “Barriera di Milano”.
Menjëherë pas vrasjes para se të largohej nga Shqipëria, ai kishte ndërruar emrin dhe identitetin e tij, duke fshirë çdo gjurmë nga jeta e tij e mëparshme.
Në Torino ai kishte ndërtuar një identitet të respektueshëm: babai i dy fëmijëve që ndiqnin shkollën, kishte hapur një kompani rinovimi ndërtesash dhe qëndroi larg telasheve.
Policia shqiptare kërkoi ndihmën e komisariatit të Torinos, e cila bëri kontrolle për indikacionet e raportuara nga kolegët e Tiranës.
Ata identifikuan një shtëpi në lagjen “Barriera di Milano”. Emri në zile nuk përputhej me atë të të arratisurit të njohur nga autoritetet shqiptare, por puna hetimore për identifikimin e tij nuk la vend për dyshime se njeriu, i cili kishte rënë në duart e policisë italiane, ishte pikërisht i shumëkërkuari në Shqipëri për vrasje Genti Sherifi.
Hetimet tashmë janë duke u zhvilluar, për të rindërtuar lëvizjet e tij në të gjithë vendin dhe për të sqaruar nëse dikush mund ta ketë ndihmuar atë në këtë arratisje që zgjati me dekada. Tani e pret ekstradimin për të vuajtur dënimin e tij.
