Kryetari i Partisë Demokratike, Lulzim Basha ka mbyllur protestën e ditës së sotme e cila ka zgjatur për disa orë duke iu bërë thirrje qytetarëve të bashkohen me uraganin popullor të 16 marsit, siçe quajti ai.
Basha tha se kjo protestë, e katërta që nga 16 shkurti ka meritën se ndezi shpresën dhe besimin e shqiptarëve për të ardhmen, ndërsa theksoi se zgjidhja e vetme për situatën është largimi i Ramës.
"Sot në të katërtën protestë radhazi, populli i bashkuar ka përfunduar etapën e fundit të asgjësimit të asamblesë së krimit dhe nxjerrjen e kësaj asambleje lakuriq para botës si kazani i plehrave, horave, hajdutëve e kriminelëve. Dita e sotme shkon përtej. Ka meritën e ndezjes së shpresës, besimit të çdo shqiptari për të nesërmen që po vjen. Ja ku jemi, shumë prej jush, prej orësh dhe ju nuk ju shkohet në shtëpi. Zgjidhja e vetme politike është largimi një orë e më parë i shkaktarit kryesor, autorit e përituesit, kryezullumqarit Edi Rama. Ikja e tij është fundi i pjesës së parë të kësaj beteje e cila do të vazhdojë me bashkimin më të madh të shpresës e besimit që shqiptarët kanë njohur në këto 3 dekada. Edhe miqtë e tij më të ngushtë, dhe ata që janë përpjekur ta mbrojnë me gjysmë zëri të vërtetën që ju keni buçitur sot. Edi Rama ka mbaruar, regjimi i tij ka marrë fund. Sado të përpiqet ta zgjasë agoninë, aq më shumë do ti shtohet makthi dhe fatura para popullit që do ta paguajë para drejtësisë, ndaj dua tu bëj një thirrje shqiptarëve të marrin pjesë në një tjetër akt vendimtar të hapjes së portave të Evropës të zgjedhjeve të parakohshme të lira e të ndershme pa Ramën dhe horrat e kriminelët e tij, Në një akt që do të na bashkojë trefish më shumë se me 16 shkurt. Më 16 mars në protestën vendimtare për ta përcjellë kufomën politike të sektit kriminal të Rilindjes për të çliruar vendit dhe për të shpëtuar të ardhmen tonë, zgjedhjet, ekonominë edhe PS."
