“Në Shtator do të nisë Reforma e Pronës ku Hipoteka, ALUIZNI dhe Agjencia e Kthimit të Pronave do të jenë të gjitha bashkë”. Kështu u shpreh kryeministri Edi Rama në takimin me koordinatorët e bashkëqeverisjes.
Kryeministri tha se kjo reformë do të japë mundësi që apelimi të bëhet brenda institucionit pa qenë nevoja të shkohet në gjykatë.
“Në Shtator jemi gati të lançojmë reformën që është punuar që në verën e shkuar, pa u krijuar ende qeveria e re, reformën për të cilën jemi zotuar të bashkimit të institucioneve të pronës. Për të pasur një Agjenci Kombëtare të pronës në mënyrë që të mos shkosh të ALUIZNI ta marrësh e pastaj te hipoteka s’ta jep, për të mos shkuar e ardhur mes institucioneve, po për të pasur një institucion, një drejtim. Kjo reformë do të jetë rrënjësore, do të racionalizojë burimet njerëzore që kemi në dispozicion në këto institucione, do të mundësojë një ecuri shumë më të shpejtë dhe efikase të modernizimit të brendshëm të këtyre institucioneve. Do të krijojë brenda këtij institucioni të ri një strukturë apeli në mënyrë që qytetarët të mos jenë të detyruar të shkojnë në gjykatë po të apelojnë brenda institucionin në një strukturë që është autonome, që do të ulë në mënyrë drastike kohën mundimet dhe mbi të gjitha do të ulë në mënyrë drastike gjithë atë dëshpërim që krijohet”, tha kryeministri Rama.
Gjithashtu Rama premtoi se deri në fund të këtij mandati është vendosur si qëllim që titujt e pronësisë të jepen më shpejt përmes një programi dixhitalizimi.
