Arabia Saudite njoftoi mbrëmë arrestimin e miliarderit arab Princit Alwaleed bin Talal, i cili vizitoi në gusht vendin tonë, duke u takuar me kryeministin Rama dhe ministrin e Jashtëm, Bushati.
Në valën e arrestimeve janë venë edhe të paktën 10 princa të tjerë, katër ministra dhe dhjetëra ish-ministra.
Njoftimi i arrestimeve është bërë në Al Arabiya, rrjetin satelitor në pronësi të Arabisë Saudite.
NY Times shkruan se arrestimi i princit Alwaleed është i sigurtë se do të dërgojë valë tronditëse si nëpërmjet Mbretërisë dhe qendrave të mëdha financiare në botë.
Ai kontrollon firmën e investimeve Kingdom Holding dhe është një nga burrat më të pasur në botë, që zotëron ose ka aksione të mëdha në News Corp, Citigroup, Twitter dhe shumë kompani të tjera të mirënjohura. Princi gjithashtu kontrollon rrjetet televizive satelitore të shikuara në të gjithë botën arabe.
Fushata gjithëpërfshirëse e arrestimeve duket të jetë masa e fundit për të konsoliduar fuqinë e princit të kurorës Mohammed bin Salman, djalit të preferuar dhe këshilltarit të lartë të mbretit Salman.
Në moshën 32-vjeçare, princi i kurorës është tashmë zëri dominues në ushtrinë saudite, politikat e jashtme, ekonomike dhe sociale, duke nxitur pakënaqësitë në familjen mbretërore që ai ka grumbulluar shumë fuqi personale në një moshë shumë të re.
Vizita ne Shqiperi
Njeriu i 45-të më i pasur i botës, Princi Al Waleed, mbërriti në Durrës me jahtin e tij super luksoz më 25 gusht të këtij viti.
Emri i tij i plotë është Alwaleed Bin Talal Bin Abdulaziz Al Saud. Ai u takua po atë ditë me kryeministrin Edi Rama dhe ministrin e Jashtëm Ditmir Bushati. Diskutimet mes tyre u përqëndruan në investimet e mundshme në fushën e turizmit, industrisë dhe infrastukturës.
