Ftesës së Kryeministrit Isa Mustafa që opozita t’i bashkohet dialogut me Serbinë, po e refuzojnë dy subjektet opozitare – Vetëvendosje dhe AAK.
“Ky dialog pa platformë dhe pa parime nuk përkrahet nga ne, sepse është një dialog që vendit i ka shkaktuar jashtëzakonisht dëme”, ka thënë për RTV 21, Donika Kadaj-Bujupi.
Shefi i grupit parlamentar të AAK-së, Pal Lekaj, shprehet se me këtë format të dialogut, ky subjekt opozitar nuk do të pranonte në asnjë mënyrë t’i bashkohej atij.
Kryeministri Mustafa, pasi bëri të ditur se do ta ftojë opozitën dhe shoqërinë civile për të marrë pjesë në tryezën e bisedimeve me Serbinë, është shprehur i bindur se vetëm kështu dialogu do të jetë më i mirë dhe më transparent.
