Trajneri i Teutës, Çezare Bexhi, nuk ka dashur të bëjë polemikë mbi penalltinë që ndëshkoi skuadrën e tij në humbjen 3-0 sot në Kukës. Në një prononcim italiani nuk komentoi vendimin e gjyqtarit Kridens Meta, që solli golin e parë për vendasit në minutën e 58-të.“Pamjet janë të qarta, ndaj nuk dua të komentoj vendimin e gjyqtarit. Nëse e pa që ishte penallti, bëri mirë që i ra bilbilit”, deklaroi 46-vjeçari.“Në pjesën e parë nuk bëmë ndeshjen që kishim përgatitur dhe vuajtëm formën më të mirë fizike të Kukësit. Në të dytën sikur po e merrnim kontrollin e lojës dhe në momentin që po dilnim te loja jonë, erdhi episodi i penalltisë që e hapi ndeshjen”, vijoi Bexhi. Trajneri shpjegoi tri ndryshimet në formacion krahasuar me ndeshjen ndaj Tiranës, duke lënë në stol Lamçen, Hodon dhe Maganin: “Parapëlqeva t’i jap më shumë hapësira atyre që kishin luajtur më pak, me qëllim që ta freskoja skuadrën në aspektin fizik”.