Ardhja me vonesë e Conor McGregor në konferencën e shtypit që ai dhe rivali i tij Nate Diaz bënë sot në mëngjes, në prag të revanshit të 21 gushtit, ka bërë që mes sportistëve dhe stafeve përkatëse të nisë një luftë. McGregor, që u përjashtua nga sfidat e UFC-200 pikërisht se refuzoi të dilte në konferencën e shtypit, këtë herë erdhi me vonesë, duke konfirmuar karakterin e tij të vështirë. “Këto evente po më çmendin, nuk i duroj. Megjithatë, ja ku jam dhe gati për të dueluar dhe kjo ka rëndësi”, ka thënë McGregor. “Ik pirdhu ti dhe i gjithë stafi jot”, i tha Diaz rivalit irlandez kur ky erdhi në konferencën, duke u larguar nga salla. Në këto momente në sallë fluturuan shishjet e ujit që ndodheshin në tavolinë gjatë konferencës për shtyp, shishe që kaluan edhe sipër kokës së gazetarëve e kameramanëve. Situata u tensionua ndjeshëm dhe pritet që dueli i 21 gushtit të jetë i flaktë. Diaz e fitoi sfidën e parë me “submission” dhe tani dy sportistët do të zhvillojnë revanshin në Las Vegas, sfidë që zhvillohet në orët e para të mëngjesit të së dielës.