Policia e Durrësit dhe RENEA kanë ndërhyrë sot në një banesë në Durrës për të shpëtuar të miturën që ishte marrë peng nga një person me aftësi të kufizuara. Siç duket edhe nga pamjet video të shpërndara nga Policia, efektivët kanë prerë herurat në një dritare të katit të parë për t’u future në banesë ku ndodhej e mitura e marrë peng.

Babai i vajzës, i tronditur nga çfarë ka ndodhur, rrëfen se fatmirësisht e bija është mirë, pavarësisht tronditjes psikologjike të pësuar.

Ai është njoftuar nga vajza e madhe për çfarë ka ngjarë në shtëpinë e tij dhe ka ndjekur nga afër të gjithë operacionin e shpëtimit të vajzës së tij të dytë.

Ndërkohë, Policia e Durrësit, në një njoftim për shtyp zbardh të gjithë dinamikën e kësaj pengmarrjeje.

 

Njoftimi i policisë:

Më datë 15.08.2016, rreth orës 07:00, në Kodër Rrashbull, shtetasi Arben Kabashi, 46 vjeç, ka kapërcyer murin rrethues dhe është futur në banesën e komshiut , ku ka marrë me forcë në banesën e tij vajzën e komshiut , shtetasen e mitur, Xh.K. 11 vjeçe. Në banesë ndodheshin vetëm tre vajzat pasi prindërit kishin ikur në punë më herët.

Me të marrë njoftimin menjëherë në vendngjarje kanë shkuar Efektivat e Policisë së Durrësit, të cilët kanë bërë rrethimin e banesës.

Shtetasi i lartpërmendur, i cili vuan nga depresioni mbante në dorë një thikë dhe kërcënonte se do të vriste vajzën. Ndodhur në këto kushte, në pamundësi të faktorit kohë për të pritur forcat më të specializuara për të tilla ndërhyrje, Efektivat e Policisë Durrës duke parë që po i kërcënohej seriozisht jeta vajzës, me iniciativë dhe me profesionalizëm kanë ndërhyrë me shpejtësi në disa drejtime duke i tërhequr vëmendjen agresorit. Falë ndërhyrjes së shpejtë dhe të specializuar të Policisë së Durrësit është bërë e mundur që e mitura të nxirret nga banesa e shtetasit Arben Kabashi dhe është dërguar në banesën e saj.

Fatmirësisht vajza është në gjendje të mirë shëndetësore, por e traumatizuar psikologjikisht ku policia menjëherë i ka çuar një psikologe. Në banesën e agresorit ishte edhe nëna e tij, ku falë ndërhyrjes së specializuar është bërë e mundur nxjerrja e saj nga banesa.

Grupi i negociatorëve të Reneas në bashkëpunim më Policinë e Durrësit pas disa orë negociatash kanë përdorur një gaz neuroparalizues duke mundësuar neutralizmin dhe kapjen e shtetasit A.Kabashi".