Disa muaj më parë, nëna e re u ndesh me fjalët e doktorit të cilat e vunë përball dilemës. Në barkun e saj rritet një vajzë me sindromën Down. Pas diagnostikimit doktori e këshilloi nënë që ta hiqte vajzën, po nëna bëri të kundërtën dhe e mbajti atë. Vogëlushja tashmë është 15 muajshe dhe quhet Emersyn Faith. Nëna e Emersyn i ka shkruar një letër doktorit duke treguar se vendimi i saj ishte më se i drejtë dhe se ndjehet mjaft e lumtur me zgjedhjen që ka bërë. 

“I dashur doktor. Kohët e fundit një shoqja ime më tregoi se mjeku i saj pasi kishte parë ekografinë i kishte thënë “Është perfekt”. Kur lindi, fëmija rezultoi me sindromën Down dhe shoqja ime shkoi për t’i kërkuar llogari mjekut, se përse nuk ia kishte thënë këtë më parë, por ai iu përgjigj: “Të thashë që ishte perfekt”.

Sa do të kisha dashur që edhe ju të ishit sjellë me mua si doktori i shoqes sime.

Erdha tek ju në një periudhë shumë të vështirë të jetës sime. Isha e terrorizuar, në ankth dhe tërësisht e përhumbur. Nuk e dija ende të vërtetën për vajzën time, por në vend që të gjeja mbështetje e kuraje, ju më këshilluat ta eliminoja fëmijën tim.

Unë ju tregova edhe emrin që doja ti vendosja, por ju më pyetët nëse ishim të sigurtë për ta sjellë këtë fëmijë në jetë, pasi jeta jonë do të ndryshonte tërësisht me një fëmijë me sindromën Down.

Pas vizitës së parë, patëm frikë të riktheheshim në klinikën tuaj. E bëtë të padurueshëm momentin më të vështirë të jetës sime, pasi nuk më thatë të vërtetën: Që vajza ime do të ishte perfekte.

Nuk jam e zemëruar, as e hidhëruar. Jam vetëm e trishtuar, sepse zemrat e vogla që pulsojnë, të cilat i shikoni çdo ditë, nuk ju bëjnë të reflektoni. Jam e trishtuar, sepse u futa në dyshime kur ju më thatë se një fëmijë me sindromën Down do të ulte cilësinë e jetës sonë. Më copëtohet zemra vetëm kur mendoj se të njëjtën gjë ia thoni nënave të tjera si unë.

Shiko doktor, Emersyn jo vetëm e pasuroi cilësinë e jetës sonë, por ka prekur edhe zemrat e mijëra personave. Ajo na ka sjellë një gëzim që është e pamundur ta shprehësh me fjalë. Ajo na ka dhuruar buzëqeshjet e puthjet më të ëmbla që kemi marrë ndonjëherë. Na hapi sytë për të parë bukurinë e vërtetë dhe dashurinë e pastër.

Lutem që asnjë nënë të mos e kalojë atë që kam përjetuar unë. Lutem që edhe ju të shikoni bukurinë dhe dashurinë e pastër në çdo ekografi që shikoni.

Dhe së fundi, lutem që herën tjetër që do të shikoni një fëmijë të prekur nga sindroma Down në barkun e një nëne, ta shikoni atë në sy dhe të më kujtoni mua, duke i thënë “Fëmija jua është perfekt.”