24 janar 2014 – Në lidhje me ngjarjen e djeshme ku automjeti i një biznesmeni shpërtheu pas vendosjes së një sasie tritoli, policia e Durrësit ka shoqëruar rreth 25 persona në komisariat. Ngjarja ndodhi mesditën e djeshme në rrugën Plazh-Plepa ku biznesmeni Xhemal Çela, është hedhur në erë me makinën e tij dhe vetëm fati i ka shpëtuar jetën, megjithëse gjendja e tij shëndetësore është kritike.  Biznesmeni po ecte me makinën e tij dhe papritur është gjendur i përfshirë nga flakët shoqëruar me një shpërthim të fuqishëm. Pas mjekimeve të para në spitalin e Durrësit, 45 vjeçari është përcjellë në Tirane, ku po i nënshtrohet ndërhyrjeve të specializuara kirurgjikale dhe mjekët theksojnë se ai ka dëmtime të rënda në gjymtyrët e poshtëm.   Ndërkohë një nga pistat kryesore të hetimit të policisë është konfliktet që biznesmeni Xhemal Çela mund të ketë pasur në fushën e ndërtimit, por nuk përjashtohen edhe pista të tjera.