16 gusht 2013- Ilir Meta nuk ka dyshim, pavarësisht dorëheqjes, kryetari i demokratëve mbetet Sali Berisha. Gjatë një interviste me Mirela Milorin në studion e “ABC News”, kreu i Lëvizjes Socialiste për Integrim e quajti si pjesë normale të jetës politike marrëdhënien e tij herë-herë konfliktuale me aleatin Edi Rama. Gjatë punës në drejtimin e Kuvendit të ardhshëm thotë se do të drejtohet nga fryma e gjithëpërfshirjes. Por Ilir Meta fton Partinë Demokratike që të mos kompleksohet nga numrat dhe të ofrojë një opozitë të standardeve europiane, përndryshe rrezikon defaktorizimin. Qeverisja me PS-në sipas Ilir Metës do të jetë pragmatiste dhe do të synojë zgjidhjen e problemeve. Ndryshimi do të ndjehet që vitin e parë, thotë kreu I LSI-së, ndërsa shton se nuk duhen pritur cudira brenda natës.