Vila që shihni në foto ndodhet në Fushë Prezë dhe është në pronësi të Admir Murataj, i shpallur në kërkim si pjesë e bandës që grabiti 3.2 milionë euro të bankës “BKT” më 9 shkurt afër Rinasit
“News24” ka publikuar fotot, teksa raporton se shtëpia ka sistem alarmi dhe kontrollohet nga kamerat në çdo cep të saj.
Mësohet se në tokën ku është ngritur kjo supervilë, ka qenë e ndërtuar më herët një banesë e vjetër, e cila është blerë nga Murataj për të ndërtuar vilën, që ka përfunudar në 2015-n.
Ky i fundit iu ka rrëfyer fqinjëve se e kishte ndërtuar shtëpinë me të ardhurat e siguruara nga emigracioni dhe me ndihmën që i jepnin dy vëllezërirt e tij edhe ata në emigracion, sipas dëshmive.
Fqinjët kanë pohuar se Murataj ka jetuar në këtë banesë në 2015-n bashkë me familjen. Në 2016-n është larguar dhe vinte vetëm rrallë për të kontrolluar shtëpinë, raporton “BalkanWeb”.
Në momentin që policia ka mësyrë në banesën e Muratajt, ka gjetur aty një person të pajtuar prej tij që të ajroste shtëpinë dhe të kujdesej për ullinjtë. Ky i fundit është shoqëruar në polici, ku tha se ishte telefonuar nga Murataj vetëm 2 ditë më parë.
Admir Murataj rezulton të jetë arratisur nga burgu i Trikallës në 2013-n bashkë me grupin e Ilir Kupës. Ai vuante dënimin për grabitjen e një banke në Larisa të Greqisë. Ai është shoqëruar në polici kur u arrestua grupi, por u la i lirë për mungesë provash.
