Trajneri Gugash Magani nuk do të ketë në dispozicion për sfidën e radhës me Kukësin mesfushorin Bruno Dita. Mesfushori i ka luajtur të gjitha ndeshjet me Teutën deri më tani, plot 20, e 19 prej tyre i ka nisur nga minuta e parë, ndërsa kjo është mungesa e parë për të, pasi ndaj Vllaznisë u ndëshkua me kartonin e tretë të verdhë.
Dita ka arritur të shënojë edhe tre gola në kampionat me “djemtë e detit”, madje njërin me vlerë 3-pikësh ia ka shënuar pikërisht Kukësit në sfidën e luajtur në stadiumin “ Niko Dovana” në fazën e dytë. Gjatë këtyre ditëve, trajneri Magani do të vendosë edhe për zëvendësuesin e Ditës në formacionin që do të zbresë në fushën e stadiumit “Zeqir Ymeri” të shtunën në Kukës.
