DURRES, 16 mars 2013– Teuta ka mundur Kastriotin, duke rregjistruar fitoren e tretë radhazi në fushën e saj. Djemtë e detit kanë qenë me mungesa të rëndësishme në këtë përballje, ndërsa nuk u ndalën deri sa siguruan fitoren. Teuta i është falur Akil Jakupit, i cili ka shënuar golin e vetëm të ndeshjes. Me vërshëllimën e parë, durrsakët e mbajnë frymën tek porta e Kastriotit, ku vunë seriozisht në vështirësi portierin Osmani.
Gjigandi Muriqi, rrëmben një top dhe derdhet në zonën kundërshtare, pason për Mancakun, po goditja e sulmuesit përfundoi jashtë. Mancaku kërkon të lëshojë një tjetër shkëndijë, kur provon nga jashtë zonës me një goditje të fortë, ndërkohë Osmani bën mrekullinë. Teuta vijon të kontrollojë lojën, të ndërtojë aksoine pa fund, por për minuta të tëra nuk iu afruan seriozisht golit. Ndërkohë nga ana tjetër krutanët përpiqeshin të mos pësonin, ndërsa vuanin pa pushim presionin e vendasve. Pjesa e parë u mbyll me Teutën në sulm, por që asnjëra prej skuadrave nuk pati rast të pastër shënimi.
Pjesa e dytë nisi menjëherë me zëvendësime të shumta, njëkohësisht tre lojtarë. Magani hedh në lojë Deliallisin për Nikën, ndërsa edhe kolegu i tij Dollaku, ka bërë dy zvendësime, ka hedhur në fushë Tanushin dhe Shabën. Teuta fiton një goditje nga këndi dhe, aty afrohet Veliaj për të krosuar. Topi i tij gjen Jakupin, i cili godet me kokë dhe shënon 1-0. Durrsakët çlirohen emocionalisht dhe përpiqen të menaxhojnë lojën duke dalë në lojën e tyre me pasime të shkurtra dhe të sakta. Autori i golit mbrojtësi Akil Jakupi u shpreh i lumtur për golin, ndërsa pohoi se më i rëndësishëm për të ishin tre pikët. “Ishte një ndeshje shumë e vështirë, por ia dolëm të fitonim. Vijuam ta ruajmë edhe për këtë javë distancën me djekësit tonë më të afërt dhe kjo është një gjë shumë pozitive për skuadrën. Arrita të shënoj dhe jam shumë i lumtur.
Ia keni marrë dorën Kastriotit
Në fakt është e vërtetë, pasi kam shënuar edhe në takimin e parë në Krujë. Besoj se do të jetë ratsësi, gjithsesi unë jam i lumtur, sepse me golat e mi po ndihmoj skuadrën. Përpara na presin disa sfida të vështira, kështu që duhet të përgatitemi mirë për ti fituar ato. ”- deklaroi mbrojtësi.
/m.l. Agjencia e lajmeve “Dyrrah”/
