8 tetor 2015 – Ndeshja e shumëpritur erdhi. Sot në mbrëmje kombëtarja shqiptare do të përballet me kombëtaren serbe në stadiumin “Elbasan Arena”, e cila mbi të gjitha është vendimtare në rrugëtimin e Shqipërisë drejt Euro 2016. Kuqezinjtë do të kërkojnë tre pikëshin në fushën e gjelbërt, ndërsa festa në të gjitha trevat shqipfolëse ka nisur prej ditës së djeshme.

Skuadra serbe e futbollit ka mbërritur prej mbrëmjes së djeshme në Tiranë nën masa të rrepta sigurie dhe sot tre orë para ndeshjes do të nisen drejt Elbasanit. Për herë të para ndodh që një ndeshje futbolli të ketë një mobilizim kaq të madh të efektivëve të policisë, ku sipas Ministrisë së Brendshme, do të jenë rreth 2300 policë, duke vlerësuar maksimalisht sigurinë e ekipit serb para, gjatë dhe pas ndeshjes. Këto masa kaq ekstreme me bllokime rrugësh kryesore dhe dytësore, edhe tunelesh gjithashtu, nuk janë marrë as me ardhjen e kryeministrit serb, Aleksandër Vuçiç në fund të majit në Tiranë, kur për sigurinë e tij u angazhuan 1500 trupa policore.

Gjatë udhëtimit të ekipit serb nga Tirana në drejtim të Elbasanit, autobusi dhe stafi i tyre do të monitorohet nga ajri me një helikopter të Forcave të Armatosura tip “Cougar”, i cili ka një rreze fushëpamje deri në 5 kilometra. Po kështu, do të bllokohen edhe valët e kompanive celularëve rreth 30 minuta përpara dhe gjatë momentit që do të bëhet lëvizja e ekipit serb në drejtim të stadiumit “Elbasan Arena”.

Nga dje ka nisur edhe patrullimi nga ajri në qytetin e Elbasanit. Duke nisur nga ora 12:00 e mesditës do të bllokohet dhe kalimi i tunelit Tiranë-Elbasan. Ndërkohë qindra tifozë nga Kosova, Presheva dhe Shkupi kanë mbërritur prej mbrëmjes në Elbasan dhe të tjerë pritet të mbërrijnë deri në 20:45, kur edhe do të nisë sfida e shumëpritur.

Çfarë duhet të shmangni gjatë ditës së sotme në Elbasan 

Të evitoni qarkullimin me automjet në bulevardin Aqif Pasha nga ora 08.00 e mëngjesit

Të evitoni qarkullimin me automjet në bulevardin Qemal Stafa nga ora 08.00 e mëngjesit

Të evitoni qarkullimin me automjet në aksin nga konservimi tek kryqëzimi i “Hajrullenjve”

Të evitoni parkimin e automjeteve përgjatë dy bulevardeve dhe përreth stadiumit Elbasan Arena

Të evitoni parkimin e automjeteve në sheshet kryesore

Të respektoni rregullat e qarkullimit rrugor

Për pjesëmarrësit në ndeshje 

Të evitoni ndjekjen e takimit nga ballkonet e pallateve dhe shtëpive përreth

Të drejtoheni për në stadium nga ora 16.30 deri në 20.15

Të evitoni mbajtjen me vete të fishekzjarreve

Të evitoni mbajtjen me vete të monedhave metalike

Të evitoni mbajtjen me vete të çakmakëve

Të evitoni mbajtjen me vete të byzylykëve apo varësve prej hekuri

Të evitoni mbajtjen me vete të rripave me tokëza metalike

Të evitoni mbajtjen me vete të çadrave kundër shiut (e diskutueshme)

Të evitoni mbajtjen e celularëve (e diskutueshme)

Të evitoni gjithçka tjetër metalike

Të evitoni bidonët e ujit (pa tapë e diskutueshme)

Të evitoni mbajtjen e simboleve raciste

Të evitoni parullat me karakter racist, nacionalist apo me domethënie fyese e poshtëruese

Të evitoni thirrjet, sharjet apo fyerjet raciste

Të respektoni himnet kombëtare

Të respektoni kontrollet dhe udhëzimet e policisë (ndryshe përfundoni në rajon)

Të mbani me vete detyrimisht kartën e identiteti dhe biletën e ndeshjes

Të mos shkaktoni prishje të rendit dhe qetësisë publike në qytet.

Të mos shtyni në radhë gjatë futjes në stadium

Të lejueshme 

Të mbani dhe demonstroni simbolet kombëtare (flamuj, qeleshe, xhamadanë, shqiponja dykrenore)

Të këndoni himnin kombëtar

Të mbështesni pa kufij dhe me kulturë ekipin kombëtar

Të duartrokisni

Të brohorisni sa të keni fuqi kur kombëtarja të shënojë gol

/portali DurresLajm/