7 tetor 2015 – Gjykata e Durrësit shpall të pafajshëm ish-kreun e Komunës Rrashbull Durrës, shtetasin Hysen Gashi, i akuzuar për dhënien e të paktën 16 lejeve të ndërtimit në kundërshtim të plotë me ligjin në zonën turistike bregdetare të “Shkëmbit të Kavajës”.

Ky vendim për pafajësinë e Gashit, ka sjellë një përplasje mes Gjykatës dhe Prokurorisë, pasi organi i akuzës kërkoi 5 vjet burgim, ndërsa gjatë procesit gjyqësor kërkoi gjithashtu dhe përjashtimin e gjyqtares Shpëtime Pitaku. Sipas Prokurorisë, gjyqtarja Pitaku kishte paraqitur njëanshmëri gjatë procesit.

Në këtë proces, së bashku me të pandehurin Gashi, ishin konsideruar përgjegjës edhe 5 ish-zyrtarë të Komunës Rrashbull, për të cilët pas një shqyrtimi gjyqësor me procedurë të shkurtuar, ata u shpallën fajtorë nga gjykata e Durrësit.

Procesi ndaj ish-kryetarit Gashi u zhvillua me procedurë të rregullt dhe seancat u drejtuan nga gjyqtarja Shpëtime Pitaku. Në përfundim të procesit, gjyqtarja Pitaku shpalli të pafajshëm ish-kryetarin Gashi për të njëjtat fakte dhe akuza, për të cilët gjykata e Durrësit shpalli fajtorë 5 të pandehurit e tjerë.

Deklarata e Prokurorisë:

Kërkoi përjashtimin e Pitakut

“Gjatë shqyrtimit gjyqësor ndaj të pandehurit Gashi, Prokuroria e Durrësit kishte bërë kërkesë për përjashtimin e gjyqtares Pitaku, pasi, për prokurorinë, gjyqtarja kishte paraqitur njëanshmëri gjatë procesit.

Kjo kërkesë u rrëzua nga një tjetër gjyqtar i Gjykatës së Durrësit dhe procesi ndaj të pandehurit Gashi vijoi nga gjyqtarja Pitaku.

Arsyet pse Prokuroria kërkoi largimin e gjyqtares 

Në kërkesën për përjashtimin e gjyqtares, Prokuroria e Durrësit, ndër të tjera, kishte parashtruar se:
“Në seancën e datës 14.05.2015 ishte kërkuar nga organi i akuzës që të merrej si provë dhe pyetja e të pandehurit Hysen Gashi. Në këtë seancë është filluar me pyetjen e të pandehurit nga përfaqësuesi i organit të akuzës, i cili kishte kërkuar dhe pyetjen dhe më pas i janë drejtuar dhe dy pyetje nga gjykata, si më poshtë:

1. Nëse nuk firmos ti, ndërsa të gjithë anëtarët e tjerë janë dakort, miratohet leja?
2. Kur janë bërë mbledhjet që ke dhënë miratimin e lejeve, ju kanë thënë se ka qenë leje në kundërshtim me ligjin?

Të dyja këto pyetje të drejtuara nga ana e gjyqtares janë të njëanshme dhe në kundërshtim me rregullat procedurale. Pyetjet e drejtuara nga gjykata janë pyetje konkluduese dhe vlerësime personale të pandehurit, të cilat kanë si qëllim favorizimin e tij në lidhje me qëndrimet që duhet të mbante ndaj fakteve për të cilën është akuzuar.

Shkelja e ligjit është një konkluzion që del nga provat që administrohen në një proces gjyqësor dhe nuk mund dal nga vlerësimi që i bën i pandehuri, fakteve objekt akuze.

Gjithsesi, kërkesa për përjashtimin e gjyqtares Pitaku nuk u pranua, dhe në përfundim të procesit gjyqësor, shpalli të pafajshëm të pandehurin Hysen Gashi”.

/S.L. portali DurresLajm/