Kundërshtari i Teutës në turin e tretë të Konferencë Ligës, Shamrok Rovers, ka marrë në javën e 21-të të kampionatit irlandez një rezultat të shkëlqyer, pasi ka mundur 3-1 rivalët e St.Patrik Atletik.
Shamrok kryeson Premier Ligën irlandeze dhe pas fitores së fundit në kampionat me trajneri Stefen Bradlej e shikon ekipin e tij në rrugën e duhur për të fituar titullin kampion.
Pas ndeshjes në kampionat, 36-vjeçari që drejton Shamrokun ka folur për herë të parë për mediat britanike rreth ndeshjes së parë me Teutën, që do të luhet të enjten në orën 21:00 në Dublin.
“Kam parë disa ndeshje të Teutës. Ata kanë një ekip vërtet teknik, lëvizin shumë dhe janë të zgjuar në manovrat e tyre. Kjo është ekzaktësisht ajo çfarë pritet nga një ekip. Ata i dinë edhe pjesët e errëta, kështu që do të jetë një sfidë e vështirë”, deklaroi trajneri.
