Klubi i Teutës ka bërë zyrtare blerjen e radhës. Skuadra durrsake ka prezantuar holandezin Arsenio Valport, i cili luan si sulmues krahu i cili konsiderohet si zëvendësuesi i Dejvi Bregut.
Kjo cilësohet si blerje tepër e rëndësishme për klubin e “djemve të detit” duke parë karrierën e tij ku është aktivizuar në Holandë me skuadra si Herenven, Zuolle, Dordrekt, Ekslesior, Almere Siti, në Izrael me Beitar Jeruzalem dhe në Hungari me Ferencvaroshin.
Zyrtarizimin e Valportit e ka bërë vetë publike klubi i Teutës me anë të një postimi në profilin e tyre në rrjetin social “Facebook”.
NJOFTIMI I KLUBIT TË TEUTËS
KF Teuta me kënaqësi komunikon marrëveshjen me futbollistin, Arsenio Valpoort. Drejtuesit e klubit dhe lojtari kanë gjetur akordin për bashkëpunim dhe lojtari tashmë është pjesë e bluve.
28-vjeçari tulipan vjen nga kampionati qipriot teksa në sezonin e fundit mbajti veshur fanellën e Ermis në elitën e futbollit të shtetit ishullor.
Sulmesi do të bashkohet ditën e merkure me ekipin në stërvitje, ndërsa është përforcimi i 6-të i Teutës në këtë afat kalimtar.
KF Teuta i uron mirëseardhje Arsenio Valpoort, duke i dëshiruar suksese dhe sa më shumë me fanellën e skuadrës tonë!
