Presidenti Ilir Meta ka reaguar lidhur me vrasjen e oficerit të krimeve në Lezhë.
Meta shkruan në një postim në Facebook se është thellësisht i tronditur nga ngjarja e rëndë ndërsa i shpreh ngushëllimet familjes, kolegëve e të afërmve të efektivit Saimir Hoxha.
Më tej, kreu i shtetit i bën thirrje autoriteteve për kapjen dhe vënien para drejtësisë të autorit, Aldo Rama.
POSTIMI I PLOTË
Thellësisht i tronditur nga ngjarja tepër e rëndë e vrasjes, në krye të detyrës, të zyrtarit të lartë të Policisë së Shtetit, Saimir Hoxha, gjatë një operacioni kundër kultivimit të lëndëve narkotike në zonën e Lezhës.
Në këto momente të vështira bashkëndaj dhembjen dhe ju shpreh ngushëllimet më të thella familjes, kolegëve dhe të gjithë punonjësve të Policisë së Shtetit!
Nxis organet ligjzbatuese, në veçanti Prokurorinë për hetimin e rrethanave dhe intensifikimin e përpjekjeve për kapjen sa më parë të autorëve të këtij akti kriminal, për t’i nxjerrë ata para drejtësisë dhe dhënien e një ndëshkimi të ashpër ligjor.
Lufta kundër krimit të organizuar, trafikut të drogës dhe kanabizimit të Shqipërisë, që ka dëmtuar seriozisht vitet e fundit imazhin e vendit dhe ka marrë aq shumë jetë njerëzish, duhet të jetë një prioritet absolut dhe të mbështetet nga të gjithë!
