Ish-deputeti socialist Alqi Bllako, i dyshuar për korrupsion, pastrim parash dhe shpërdorim detyre në lidhje me inceneratorët ne Fier, i ka kërkuar sot gjykatës lehtësim të masës arrest me burg.
Këtë të shtunë, në Tiranë vijon seanca gjyqësore ndaj Bllakos. Irena Gjoka do të vlerësojë masën e arrestit me burg, ndërkohë që mësohet se ish-deputeti ka kërkuar lehtësim të masës të sigurisë.
Ndaj ish deputetit Alqi Bllako, Prokuroria ka ngritur akuza për “Shpërdorim të detyrës” në bashkëpunim dhe “Korrupsion pasiv i fuknsionarëve të lartë shtetërorë”. Ai dyshohet se ka përgatitur dokumentacion të falsifikuar në lidhje me të dhënat e pronës së shpronësuar, për ndërtimin e inceneratorit të Fierit, duke ndryshuar cilësimin nga “arë” në “tokë truall”, duke rritur vlerën e shpronësimit.
Po ashtu ai dyshohet se ka favorizuar shoqërinë përfituese të koncensionit, në këmbim “të përfitimeve të parregullta” me një vlerë prej afro 150 mijë dollarë, të cilat kanë shkuar në formën e pagesave të larta mujore për babanë e tij, i punësuar pranë inceneratorit të Tiranës.