Yevgeny Prigozhin bëhet i gjallë. Ai gjendet në Bjellorusi bashkë me mercenarët e tij, pasi refuzoi ofertën për punë nga presidenti rus, Vladimir Putin, pas rebelimit të armatosur të ndërprerë në mes. “Mirë se erdhët në Ferr!”, ishte fjalia me të cilën përshëndeti luftëtarët e tij përpara se të paralajmëronte misione të reja, siç tha ai, deri në pushtimin e botës.
“Ky nuk është fundi! Por ky është vetëm fillimi i punës më të madhe në botë që do të bëhet shumë shpejt! Ne luftuam ne nder! Ju keni bërë shumë për Rusinë. Ajo që po ndodh tani në frontet e betejës është një turp në të cilin nuk duhet të marrim pjesë. Ne duhet të presim momentin kur mund të tregojmë vërtetë veten”, tha Prigozhin.
Ai snjalizoi një mision të ri për në Afrikë, por edhe një mundësi për rikthim në luftën e Ukrainës, por me kushtin e vetëm që Wagner të mos detyrohet të mbulojë me turp trashëgiminë e vet ushtarake. Prigozhin ka braktisur atdheun e tij, Rusinë, pas ndarjes përfundimtare me presidentin Putin, i cili mbylli dhe zyrat e grupit mercenar.
Aktualisht Wagner është angazhuar në trajnimin e ushtrisë së Bjellorusisë nga vetë presidenti i këtij shteti, Aleksandër Lukashenko. Mercenarët janë parë të kryejnë stërvitje me forcat speciale bjelloruse vetëm 5 kilometra nga kufiri me Poloninë, vend anëtar i NATO-s. Për këtë janë publikuar edhe pamje filmike. Mercenarët e Wagner janë të maskuar ndërsa japin udhëzime për përdorimin e mjeteve luftuese, shpjegojnë taktika si dhe trajnojnë ushtarët në përdorimin e dronëve.
Nga ana tjetër e kufirit, Polonia njoftoi se është përgatitur për skenarë të ndryshëm dhe se po monitoron me kujdes situatën me Bejllorusinë. Lidhur me këto zhvillime ka reaguar dhe Rusia. Zëdhënësi i Kremlinit, Dmitry Peskov thotë se vendosja e 500 policëve shtesë nga ana e Polonisë me arsyetimin e prezencës së ushtrisë bjelloruse dhe mercenarëve të Wagner në kufi është “një zhvillim shqetësues”. Zëdhënësi i Putinit e konsideroi Poloninë një shtet agresiv që duhet monitoruar me kujdes.
