Shqipëria është destinacioni i ri evropian për të cilën turistët nuk e dinë se kanë nevojë.

Me këtë titull e përditshmja amerikane ‘Inside Hook’ fton lexuesit  të vizitojnë vendin tonë dhe  liston edhe arsyet se pse Shqipëria nuk do t’i zhgënjejë.

Për një javë pushime ajo rekomandon disa vende për të eksploruar pak nga bukuritë e shumta natyrore. Tirana mbetet ndalesa e parë perfekte duke qenë se kryeqyteti ofron qasje të lehtë si në plazhet në jug ashtu edhe në malet në veri.

Në zemër të Tiranës vizitorët do të ndeshen me sheshin “Skënderbej”, i preferuar si nga vendasit ashtu edhe nga turistët. Xhamia e Ethem Bej  e shekullit të XVIII me muralet e saj të mrekullueshme, por edhe Muzeu Kombëtar në skajin tjetër të sheshit janë mes shumë atraksioneve të tjera që ofron kryeqyteti.

Tirana

‘Inisde Hook’ nuk harron pa përmendur Kalanë e Tiranës, por edhe  Bunkart, një bunker i periudhës komuniste i shndërruar në muze. Nga Tirana vizitorët mund të drejtohen drejt Beratit i njohur si qyteti i një mbi një dritareve.

Berat

Pjesë e listës së vendeve të Trashëgimisë Botërore të UNESCO-s në vitin 2008, Berati është shembull i rrallë i arkitekturës së periudhës osmane. Një  qytet i njohur për arkitekturën e tij të shkëlqyer të epokës otomane është po ashtu edhe “qyteti i gurtë” i Gjirokastrës.

Kështjella e Gjirokastrës

Zemra e qytetit është zona e pazarit me rrugët e tij të ngushta e me kalldrëm. Edhe kalaja e Gjirokastrës e ndërtuar në shekullin e IV ofron një pamje piktoreske të qytetit. Po aq i bukur sa Gjirokastra është edhe qyteti i Sarandës ku turistët do të gjejnë plazhe të denja për të pasuruar rrjetet sociale me foto dhe video të bukura.

Saranda

Përveç plazheve të Sarandës rekomandohen gjithashtu edhe ato të  Himarës, Vunosë dhe Dhërmiut. Nëse pasioni është më i madh për malin, Alpet Shqiptare janë zgjidhja perfekte! E bekuar me muaj të gjatë me diell, dhe një kuzhinë të ndikuar nga fqinjët e largët e të afërt, duke përfshirë Greqinë, Italinë dhe Turqinë, Shqipëria thotë e përditshmja amerikane “ofron më të mirat e turizmit evropian me një kosto të papërfillshme”.