Shqipëria u njoh këtë të shtunë me kundërshtarët që do të përballet në fazën finale të Kampionatit Europian “Gjermani 2024”.
Në shortin e hedhur në Hamburg të Gjermanisë, goglat kapricoze e pozicionuan Shqipërinë në Grupin B, përballë Spanjës, Italisë dhe Kroacisë.
Trajneri i ekipit kombëtar, Sylvinho komentoi rivalët e Shqipërisë duke theksuar se kuqezinjtë do të bëjnë gjithçka për të befasuar.
“Ishte një mbrëmje e bukur. Është mrekulli të jesh këtu. Të gjithë ne kemi bërë mirë deri këtu. Njerëzit duhet të kujtojnë çdo ndeshje që kemi fituar e barazuar për të ardhur këtu. Tani ndryshon pak dhe jemi në një grup të vështirë. Kundërshtarët janë mësuar të luajnë në finalet e Europianit dhe të Botërorit. Flasim për skuadra të forta si Spanja, Italia, Kroacia.. Ne duhet të provojmë mundësitë tona. E kemi bërë deri tani kundër Republikës Çeke, Polonisë. Në 90 minuta mund të ndodhë gjithçka.
E dimë që kundërshtarët janë të fortë. Por në momentin që flitet për tre ndeshje finale të një Kampionati Europian, nuk mund të flasim për një favorit. Të gjithë janë favoritë. Ne do të shkojmë të luajmë futboll, do të bëjmë punën tonë. Në 90 minuta mund të ndodhë gjithçka.
Mendoj se lojtaret janë të lumtur që do të shkojnë në finalet e një Europiani. Ishte një ëndërr dhe është një ëndërr për të gjithë ne. Tani do ta shfrytëzojmë këtë mundësi akoma edhe më shumë”.
