Tregu i futbollit europian duket se ka humbur çdo lidhje me realitetin. Në verën e vitit 2026, klubet po paguajnë shifra marramendëse edhe për futbollistë që nuk bëjnë pjesë në elitën absolute të futbollit botëror. Sipas vlerësimeve të Transfermarkt, 10 transferimet më të shtrenjta të kësaj vere janë realizuar mesatarisht me 45% mbi vlerën e tyre të tregut.

Nëse vitet e fundit ishte bërë normale të shihje shifra të ekzagjeruara për lojtarë të nivelit të dytë, këtë verë situata ka marrë përmasa të reja.

“Klubi i 100 milionëve” nuk është më një rreth ekskluziv për superyjet. Për shifra mbi 100 milionë euro po transferohen gjithnjë e më shumë futbollistë që nuk kanë qenë pjesë e elitës së çmimeve individuale.

Mjafton të shikosh listën e 10 transferimeve më të shtrenjta të kësaj vere: asnjë prej tyre nuk ka qenë në Top 30 të edicionit të fundit të Topit të Artë.

Klubet angleze janë protagonistët kryesorë të kësaj “çmendurie”.

Transferimi më i shtrenjtë deri tani është ai i Morgan Rogers, për të cilin Chelsea ka paguar 138 milionë euro, ndërsa Transfermarkt e vlerëson lojtarin me 90 milionë euro. Diferenca është plot 53.33%.

Rasti edhe më ekstrem është ai i Mateus Fernandes, për të cilin Tottenham ka paguar 99 milionë euro, ndërsa vlera e tij e vlerësuar është vetëm 50 milionë. Pra, klubi londinez ka paguar pothuajse 98% më shumë. Edhe transferime të tjera janë realizuar me diferenca të konsiderueshme.

Lojtari                     Klubi            Vlera               Transferimi        Diferenca
Morgan Rogers     Chelsea              €90 mln             €138 mln                 +53.3%
Elliot Anderson     Man. City           €110 mln             €135 mln            +22.7%
Diomande              Real Madrid     €90 mln                €125 mln             +38.9%
Tonali                      Tottenham       €80 mln                €108 mln             +35%
Mateus Fernandes   Tottenham    €50 mln                €99 mln                +98%
Guimarães                 Arsenal         €70 mln                €87.5 mln            +25%
Gonçalo Ramos        Milan             €30 mln                €74 mln                +146.7%
Gordon                       Barcelona    €65 mln                €70 mln                +7.7%
Rodrigo                       Barcelona    €55 mln                €70 mln                +27.3%
Summerville               Al Hilal          €45 mln                €64.5 mln            +43.3%

Shifrat tregojnë se inflacioni në tregun e transferimeve është përshpejtuar ndjeshëm. Në 10 transferimet më të shtrenjta të sezonit të kaluar, klubet kishin paguar mesatarisht 6.18% më shumë sesa vlera e lojtarëve sipas Transfermarkt.

Këtë verë, diferenca është ngjitur në 45.07%. Edhe më domethënëse është krahasimi i vlerës totale. Për 10 transferimet më të shtrenjta të këtij viti janë shpenzuar rreth 993.78 milionë euro, kundrejt 817.6 milionë eurove një vit më parë.

Por paradoksi është se lojtarët e blerë këtë verë kanë një vlerë të kombinuar më të ulët: 685 milionë euro, krahasuar me 770 milionë euro në vitin 2025.

Pra, klubet po paguajnë më shumë për lojtarë që në letër vlejnë më pak. Në këtë treg të çmendur, klubet spanjolle duket se kanë treguar më shumë kujdes. Real Madrid, Barcelona dhe Atlético Madrid kanë qenë aktivë në merkato, por shpenzimet e tyre mbeten më të kontrolluara krahasuar me klubet angleze.

Në 10 transferimet më të shtrenjta të La Ligës këtë verë janë investuar rreth 509 milionë euro, për lojtarë që vlerësohen në total me 463 milionë euro. Kjo përfaqëson një rritje prej rreth 10%, shumë më e ulët se mesatarja e tregut europian. Ka edhe raste kur klubet spanjolle kanë blerë lojtarë për më pak se vlera e tyre të vlerësuar.

Lojtari                   Klubi                    Vlera               Transferimi           Diferenca
Diomande           Real Madrid          €90 mln                €125 mln             +38.9%
Gordon               Barcelona                €65 mln                €70 mln                +7.7%
Rodrigo               Barcelona                €55 mln                €70 mln                +27.3%
Cucurella             Real Madrid           €50 mln                €55 mln                +10%
Cuti Romero       Atlético                   €50 mln                €40 mln               -20%
Hjulmand            Atlético                   €45 mln               €40 mln                -11.1%
Kang In-Lee        Atlético                    €28 mln               €40 mln                +42.9%
Espí                      Real Madrid          €20 mln                €25 mln                +25%
Adeyemi              Barcelona              €40 mln                €22 mln                -45%
Grimaldo             Atlético                   €20 mln                €22 mln                +10%

Real Madrid është klubi spanjoll që ka shpenzuar më shumë këtë verë. Madrilenët kanë investuar rreth 225 milionë euro, ndërsa vlera e lojtarëve të transferuar arrin në rreth 252 milionë euro sipas Transfermarkt. Pra, në total, klubi ka shpenzuar më pak sesa vlera e tyre e vlerësuar.

Edhe klube të tjera spanjolle kanë bërë marrëveshje të favorshme. Getafe ka shpenzuar rreth 19.5 milionë euro për lojtarë të vlerësuar në 51.9 milionë euro, ndërsa Espanyol ka paguar vetëm 5.55 milionë euro për futbollistë me një vlerë të kombinuar prej rreth 35.5 milionë euro.

Inflacioni i krijuar nga Premier League po ndikon edhe në pjesën tjetër të Europës. Kur klubet angleze paguajnë shifra të jashtëzakonshme për lojtarë, kjo rrit automatikisht pritshmëritë financiare edhe për klubet dhe futbollistët e tjerë. Rezultati është një zinxhir ku rriten njëkohësisht çmimet e transferimeve dhe pagat.

La Liga duket se po përpiqet të ruajë një qasje më të kujdesshme për të shmangur probleme financiare. Në Angli, ndërkohë, shifrat vazhdojnë të rriten.

Tregu europian i transferimeve po hyn në një zonë të rrezikshme: gjithnjë e më shumë para po shpenzohen për lojtarë që në letër vlejnë dukshëm më pak. Dhe nëse kjo tendencë vazhdon, “flluska” e merkatos mund të jetë duke u afruar me pikën e shpërthimit.