Presidenti i UEFA-s, Aleksander Ceferin po përpiqet të ndryshojë rregullin e tij për të qëndruar në pushtet deri në vitin 2031.
Ceferin u zgjodh në vitin 2016, duke zëvendësuar Michel Platini dhe një nga reformat që ai vendosi ishte një kufi prej tre mandatesh për të gjitha emërimet ekzekutive.
Ai do të largohet në vitin 2027, por mbështetësit e sllovenit po punojnë për një plan për të ndryshuar rregullin.
Nëse do të vendosej, Ceferin, i cili nuk kishte kundërshtar kur u rizgjodh këtë vit, mund të kandidojë përsëri në 2027.
Por ish-shefi ekzekutiv i Manchester United, David Gill, anëtar i komitetit ekzekutiv të UEFA-s, po udhëheq opozitën ndaj çdo ndryshimi.
Amendamenti, të cilin mbështetësit e tij e dëshirojnë pasi Ceferin mori përsipër pjesërisht mandatin katërvjeçar të Platini-s në detyrë, do të thotë se çdo emërim përpara vitit 2017 nuk do të llogaritet si pjesë e tre mandateve të lejueshme.
Çështja u ngrit në një takim të komitetit ekzekutiv javën e kaluar, kur Gill mendohet të ketë argumentuar se plani ishte jodemokratik.
Të tjerët në takim shprehën gjithashtu kundërshtimin e tyre, megjithëse nuk dihet nëse Ceferin, i cili ka një mbështetje të madhe në Evropën Lindore, ka mbështetje më të gjerë për të shtyrë planin e tij të diskutueshëm.
Propozimi do të shkojë përpara kongresit të UEFA-s në Paris më 8 shkurt, ku Ceferin do të ketë nevojë për dy të tretat e shumicës së 55 anëtarëve të UEFA-s, që statutet përkatëse të amendohen.
“Komiteti ligjor propozoi një sërë ndryshimesh në statut të cilat qartësojnë disa dispozita ekzistuese për të siguruar që asnjëra të mos jetë e zbatueshme në mënyrë retroaktive – në përputhje me një parim bazë ligjor. Si komiteti qeverisës ashtu edhe komiteti ekzekutiv miratoi ndryshimet të cilat tani do të shqyrtohen nga kongresi në shkurt”, thuhej në një deklaratë të UEFA-s të hënën.
