Një shqiptar është plagosur në orët e para të mëngjesit në rrugën Sidhirokastru në zonën Votanikos të Athinës.
Sipas policisë viktima quhet Renis Fajzolli, 34 vjeç. Mësohet se ai ndodhej në një park ku do të takonte një person të panjohur për autoritetet. Ende nuk dihet se çka ndodhur saktësisht, por mësohet se ka qenë vetë Fejzolli i cili ka kërkuar ndihmë nga një ekip mjekësh që po kalonte me ambulancë në zonë. Ai u tha mjekëve se u qëllua me një pistoletë dhe se nuk i njihte autorët.
Fejzolli u dërgua në spitalin Gjenimatas të Athinës ku edhe iu nënshtrua një operacioni për heqjen e plumbave. Mjekët thonë se gjendja e tij është e rëndë. Policia gjeti në vendngjarje 3 gëzhoja të një pistolete 9mm, ndërsa makina e tipit “Smart” të shqiptarit do i nënshtrohet kontrollit për gjetjen e ndonjë gjurme të autorëve.
Zona në të cilën ndodhi ngjarja është arenë e përballjes mes bandave të gjobëvënësve të lokaleve të natës në Athinë. Ajo është vetëm pak metra nga zona e lokaleve të natës Gazi, vend ku ndodhin shpesh akte dhune dhe përleshje të armatosura mes bandave.
34-vjeçari u arrestua në vitin 2019 për një çështje droge, por provat e deritanishme nuk tregojnë për përfshirjen e tij në ndonjë rast tjetër të rëndë.
