Seanca konstituive e Kuvendit të Serbisë, ku u konfirmuan mandatet e deputetëve të përbërjes së re, kaloi me fishkëllima nga opozita.
Deputetët e opozitës ishin para foltores me pankarta ku shkruhej “I keni vjedhur zgjedhjet” dhe “Hajdutë kthejini mandatet”.
Lista e opozitës Serbia kundër dhunës (Srbija protiv nasilja) pretendon se zgjedhjet e dhjetorit ishin të parregullta, gjë që pushteti e refuzon.
Për shkak të akuzave për vjedhje zgjedhore, deputetët e listës Serbia kundër dhunës e kanë bërë betimin në korridorin e Kuvendit dhe jo në sallë.
Para tyre këtë e kanë bërë deputetët e koalicionit të djathtë Shpresa (Nada), i cili përbëhet nga Partia e Re Demokratike e Serbisë dhe Lëvizja për Rimëkëmbjen e Mbretërisë së Serbisë.
Në vazhdim të seancës së parë, e cila nuk duhet të jetë në të njëjtën ditë, deputetët duhet të zgjedhin kryetarin dhe nënkryetarët e Kuvendit, të emërojnë sekretarin e përgjithshëm, të zgjedhin anëtarët e trupave punues, si dhe anëtarët e përhershëm. delegacionet parlamentare në institucionet ndërkombëtare./REL
