Komisioneri Evropian për Fqinjësinë dhe Zgjerimin, Olivér Várhelyi, tha se është në interes të Bashkimit Evropian që zgjerimi të ndodhë së shpejti. Ai foli në forumin “BE takon Ballkanin” në Sofje të hënën, njoftoi agjencia bullgare e lajmeve BTA.
Várhelyi tha se konteksti gjeopolitik ka ndryshuar gjatë viteve të fundit.
Várhelyi theksoi se politika e zgjerimit i referohet investimeve të qarta gjeopolitike. Fqinjët e BE-së janë partnerët e saj afatgjatë për paqe dhe prosperitet, kështu e shohin ata anëtarësimin e tyre, por kështu BE-ja duhet ta shohë edhe rolin e zgjerimit.
Reformat e nevojshme duhet të zbatohen së bashku për të përshpejtuar procesin e pranimit të secilit vend, tha Komisioneri për Zgjerimin. Ai gjithashtu theksoi se është e rëndësishme që secili vend të respektojë obligimet e veta.
Komisioni aktual Evropian e filloi mandatin e tij me tre vende kandidate dhe tani janë nëntë. Tre vende kanë marrë dritën jeshile për të hapur negociatat e pranimit.
Tani ekziston një axhendë e qartë për të përshpejtuar integrimin real. Kjo do të thotë tejkalim i hendekut ekonomik, tha komisioneri. Komisioni i ardhshëm Evropian duhet të mirëpresë anëtarët e rinj të BE-së, shtoi ai.
