Policia ka vendosur në pranga tre të rinj që akuzohet se grabitën një automjet tip “Benz GLK” në një garazh në rrugën “Tre Dëshmorët”, Yzberisht.

Në pranga kanë rënë Ambri Taga, 27 vjeç dhe Arlindo Taga, 29 vjeç, banues në Tiranë, si edhe Kostandin Bregu, 33 vjeç, banues në Shijak, të akuzuar për veprën penale “Vjedhja”.

Sipas uniformave blu, në datën 09 tetor Ambri Taga ka vjedhur makinën në garazh. Ndërsa Arlindo Taga e ka shoqëruar me një automjet tjetër para, si dhe pas kryerjes së vjedhjes ka shoqëruar automjetin e vjedhur dhe kanë lëvizur të dy automjetet bashkë.

Nga hetimet ka rezultuar se Kostandin Bregu ka dashur që t’i shesë automjetin e vjedhur të riut me iniciale A. T., banues në Shijak. 27-vjeçari raportohet se ka patur dijeni që automjeti është i vjedhur, por nuk e ka kallëzuar atë pranë organeve kompetente, ndaj u procedua në gjendje të lirë për “Moskallëzimi i krimit”.

Ndërkohë po punohet për kapjen e shtetasit me iniciale D. T.

Njoftimi i policisë:

Tiranë

Finalizohet operacioni policor i koduar “GLK”, për goditjen e veprimtarisë kriminale në fushën e vjedhjes së pasurisë.

Vodhën një automjet, në një garazh në rrugën “Tre Dëshmorët”, në Yzberisht, arrestohen 3 shtetas.

Procedohet në gjendje të lirë një shtetas, për moskallëzim krimi, si dhe punohet për kapjen e një shtetasi tjetër.

Specialistët për Hetimin e Krimeve të Komisariatit të Policisë Nr. 6, në vijim të punës për goditjen e veprimtarisë kriminale në fushën e vjedhjes së pasurisë dhe për vënien përpara përgjegjësisë penale, të autorëve, kanë organizuar dhe finalizuar operacionin policor të koduar “GLK”.

Gjatë operacionit u arrestuan shtetasit A. T., 27 vjeç, A. T., 29 vjeç, banues në Tiranë, dhe K. B., 33 vjeç, banues në Shijak, për veprën penale “Vjedhja”, parashikuar nga neni 134 i Kodit Penal.

Gjithashtu u procedua në gjendje të lirë shtetasi A. T., 27 vjeç, banues në Shijak, për veprën penale “Moskallëzimi i krimit”, parashikuar nga neni 300 i Kodit Penal, dhe po punohet për kapjen e shtetasit D. T.

Nga veprimet hetimore të kryera dyshohet se më datë 09.10.2024, shtetasi A. T., 27 vjeç, ka vjedhur një automjet tip “Benz”, në një garazh në rrugën “Tre Dëshmorët”, në Yzberisht. Shtetasi A. T., 29 vjeç, e ka shoqëruar me një automjet tjetër para, si dhe pas kryerjes së vjedhjes ka shoqëruar automjetin e vjedhur dhe kanë lëvizur të dy automjetet bashkë.

Nga veprimet hetimore të kryera ka rezultuar se shtetasi K. B., ka dashur që t’i shesë automjetin e vjedhur shtetasit A. T., i cili dhe pse ka patur dijeni që automjeti është i vjedhur, nuk e ka kallëzuar atë pranë organeve kompetente.

Materialet i kaluan Prokurorisë.