Nëse njëri nga një palë binjakë është alergjik ndaj një substance të caktuar, a do të thotë kjo se edhe binjaku tjetër do të ketë të njëjtën ndjeshmëri?
Ekspertët thonë se alergjitë shkaktohen nga një kombinim i faktorëve gjenetikë dhe atyre mjedisorë. Sa më shumë elementë të përbashkët të kenë dy persona, aq më të larta janë gjasat që ata të ndajnë të njëjtat alergji.
Binjakët, veçanërisht ata identikë që ndajnë 100% të gjeneve, kanë më shumë mundësi të jenë alergjikë ndaj të njëjtave substanca. Por kjo nuk është gjithmonë e sigurt. Një studim australian zbuloi se rreth 60% deri në 70% e binjakëve në një grup studimi kishin të dy alergji mjedisore, me probabilitet më të lartë tek binjakët identikë krahasuar me ata vëllazërorë.
Alergjitë ndodhin kur sistemi imunitar ngatërron substanca të zakonshme dhe të padëmshme si të ishin të dëmshme. Kjo shkakton një reagim imunitar që çon në simptoma si teshtima, kruarje, rrufë apo lotim të syve.
Në fëmijëri, ndikimi i mjedisit është thelbësor. Binjakët që rriten në kushte të ndryshme, si në zonë rurale apo urbane, ose me faktorë si prindër duhanpirës apo jo, mund të zhvillojnë ndjeshmëri të ndryshme ndaj alergjive — ose të mos zhvillojnë fare.
Studime të tjera mbi alergjitë ushqimore, si ajo ndaj kikirikut, konfirmojnë të njëjtën prirje: binjakët identikë kanë më shumë gjasa të kenë të dy alergji, por nuk është e garantuar.
