Pavarësisht pritshmërive të larta, vota e diasporës nuk solli surpriza në zgjedhjet e 11 majit. Deri pasditen e së premtes, ishin numëruar mbi 145 mijë nga gjithsej 194 mijë fletë votimi të ardhura nga jashtë. Partia Socialiste kryeson bindshëm me mbi 78 mijë vota (54%), ndërsa rreth 50 mijë zarfe nga Greqia mbetën të paçelura për shkak të kontestimeve të opozitës.
Demokratët ngritën dyshime për manipulime, duke pretenduar se një pjesë e votave janë plotësuar nga militantë të PS-së. Megjithatë, Komisioni i Ankimeve dhe Sanksioneve pranoi ankesën e PS-së për të përfshirë në numërim edhe votat nga Greqia, vendim që u zbatua më 16 maj, duke çuar në rifillimin e procesit.
Pas socialistëve, më shumë vota mori koalicioni PD-ASHM me 28%, ndjekur nga “Shqipëria Bëhet” dhe “Mundësia”. Sipas analizave, fushatat jashtë vendit kanë ndikuar drejtpërdrejt në rezultatet, me PS-në që zhvilloi mitingje të mëdha në Athinë, Londër e Milano.
Lëvizja Bashkë, me pjesëmarrje modeste në diasporë, siguroi më pak se 3% të votave. Ndërkohë, pritshmëritë e partive të reja për të fituar mandate përmes votës së emigrantëve nuk u përmbushën, me vetëm PS-në që arriti të fitojë një mandat përmes këtij kontingjenti votuesish.
