Marrëdhënia midis Barcelonës dhe Federatës së Futbollit të Spanjës po bëhet gjithnjë e më e tensionuar. Lëndimi i fundit i Lamine Jamal, i cili u detyrua të humbasë ndeshjen kundër Valencias dhe është në dyshim për debutimin në Ligën e Kampioneve kundër Njukasëll, ka ringjallur tensionet e vjetra midis dy institucioneve.
Sipas Mundo Deportivo, katalanasit dhe trajneri Hansi Flik kritikuan mënyrën se si Luis de la Fuente e trajtoi Jamalin, duke e akuzuar atë se kishte luajtur shumë minuta në ndeshjet kundër Bullgarisë dhe Turqisë, pavarësisht një dëmtimi të vogël në ijë. Flik shprehu publikisht zhgënjimin e tij, duke theksuar komunikimin e dobët me federatën dhe duke përsëritur nevojën për të mbrojtur lojtarët.
Megjithatë, RFEF pohon se Jamal mori pjesë rregullisht në stërvitje dhe në të dy ndeshjet, duke luajtur 73 dhe 79 minuta, dhe se fizioterapisti Fernando Galan nuk raportoi probleme. Barcelona, nga ana tjetër, pretendon se ka informuar mjekët e ekipit kombëtar, duke kundërshtuar versionin e federatës.
Deko, drejtori sportiv i blaugranas, ka bërë thirrje për protokolle më të qarta midis klubeve dhe federatave, duke theksuar ngarkesën e lartë të punës së lojtarëve. Çështja Jamal nxjerr në pah edhe një herë vështirësitë në komunikim midis Barcelonës dhe RFEF, duke e komplikuar menaxhimin e talenteve të rinj në ekipin kombëtar.
