Ishte një ndeshje që dukej se po shkonte në drejtimin e duhur për Teutën, por në vetëm 20 minuta gjithçka u kthye përmbys. Përballë Partizanit, durrsakët përjetuan një mbrëmje për t’u harruar, duke pësuar tre gola në një hark kohe të shkurtër dhe duke humbur kontrollin e një takimi që e kishin në favorin e tyre. Teuta kishte hyrë në këtë ndeshje me moral të lartë dhe me bindjen se mund të merrte rezultat pozitiv. Megjithatë, një seri gabimesh individuale dhe mungesa e përqendrimit në momente kyçe e ndëshkuan rëndë skuadrën. Kjo ishte ndoshta paraqitja më e dobët e durrsakëve në këto dhjetë javë kampionat, ku ekuilibri dhe qetësia, dy armët kryesore të Teutës, u zhdukën plotësisht.
Mbrojtja, që tradicionalisht ka qenë pika më e fortë e ekipit, u gjend shpesh e çorientuar dhe e pambrojtur përballë sulmeve të shpejta të Partizanit. Nga ana tjetër, edhe repartit ofensiv i mungoi qartësia dhe efektiviteti. Sulmuesi Zela kishte mundësinë e artë për të shënuar golin e tij të parë në Superiore, por gaboi nga pika e bardhë, duke humbur një penallti që mund të kishte ndryshuar fatin e takimit. “Penallti humbin edhe lojtarë botërorë,” thonë shpesh trajnerët për të zbutur presionin, por ajo që mbetet është fakti se Teuta mori një “grusht” të fortë që duhet të shërbejë si sinjal alarmi. Humbja nuk është fundi i botës, por mund të jetë fillimi i një reflektimi të nevojshëm për “Djemtë e Detit”.
Teuta ka treguar se di të reagojë pas momenteve të vështira, dhe pikërisht ky është testi i radhës. Të rikthejë qetësinë, përqendrimin dhe forcën që e kanë bërë një skuadër të respektuar në Superiore. Ashtu si në shumë kampionate të tjera në botë, edhe Kategoria Superiore është ndërprerë për shkak të ndeshjeve të Kombëtares. Kjo pauzë është një mundësi e artë për Teutën që të rikuperojë energjitë dhe të përgatitet maksimalisht për sfidën e rëndësishme të fundjavës së ardhshme kundër Vorës, në kuadër të javës së 12-të të kampionatit.
