Pas fitores së rëndësishme ndaj Vorës, Teuta vazhdon përgatitjet për sfidën e radhës në kampionat, ku do të përballet me Vllazninë, një kundërshtar me traditë dhe pretendime. Skuadra durrsake vjen me moral të lartë, ndërsa ndër lojtarët më në formë mbetet Daniel Votlai, i cili ka spikatur me paraqitjet e tij në javët e fundit. Votlai flet për suksesin e fundit, formën personale dhe pritshmëritë për duelin e ardhshëm.
Daniel, urime për fitoren ndaj Vorës. Si e përjetuat këtë ndeshje dhe cili ishte çelësi i suksesit?
Ishte një ndeshje që e dinim se do të kishte intensitet të lartë, por ekipi reagoi shumë mirë. Qëndruam të organizuar dhe ishim cinikë përpara portës. Çelësi ishte përqendrimi dhe qetësia në momente të vështira, sidomos kur loja u balancua.
Si e vlerëson formën tënde në këtë periudhë?
Ndihem shumë mirë dhe jam në rritje. Kam punuar fort në aspektin fizik dhe më gëzon fakti që kjo punë po duket në fushë. Dua të kontribuoj me ritëm, agresivitet dhe zgjidhje të sakta në zonat e rëndësishme. Forma lidhet edhe me besimin që më jep stafi dhe mbështetja e skuadrës.
Sa e rëndësishme ishte fitorja me Vorën për vijimësinë e kampionatit?
Shumë e rëndësishme. Na duheshin pikët për moral dhe për të vazhduar në mënyrën e duhur. Fitorja na jep qetësi për të punuar, por njëkohësisht na kujton se duhet të vazhdojmë me të njëjtin ritëm, sepse kampionati është i fortë dhe çdo detaj ka peshën e vet.
Ndeshja e radhës është ndaj Vllaznisë. Si e shihni këtë përballje dhe çfarë duhet të bëjë Teuta për rezultat pozitiv?
Vllaznia është një skuadër me traditë, shumë e rrezikshme nëse i lë hapësira. Do të jetë një ndeshje fizike dhe me ritëm. Ne duhet të jemi kompaktë, të fitojmë duelet në mesfushë dhe të shfrytëzojmë çdo rast. Me intensitet të vazhdueshëm dhe vendimmarrje të qetë, mund të marrim pikë. Për ne është një test karakteri dhe jemi gati ta përballojmë.
Cili është objektivi i Teutës në këtë transfertë?
Objektivi është i qartë, të marrim pikë dhe të tregojmë se jemi një skuadër e fortë edhe në transfertë. Shkojmë për fitore, por mbi të gjitha duam një paraqitje të qëndrueshme. Nëse ruajmë ekuilibrin dhe japim maksimumin për çdo top, mund të arrijmë rezultatin që kërkojmë.
