Presidenti Ilir Meta ka krahasuar zgjedhjet e ardhshme në vendin tonë me ato të Maqedonisë së Veriut të cilat do të mbahen pas disa ditësh.
Kreu i Shtetit shkruan në Facebook se në vendin fqinj mbizotëron një atmosferë sigurie dhe demokracie falë pjekurisë të lidershipit politik në tërësi ndërsa tek ne edhe pse nuk ka datë zgjedhjesh ende në horizont, ka një tension artificial sikur zgjedhjet do jenë nesër.
Meta shkruan se duhet bërë çdo gjë për të mos mbetur pas Maqedonisë së Veriut në rrugën drejt anëtarësimt në Bashkimin Europian dhe sipas tij, nuk është koha për fjalë, por për vepra konkrete.
POSTIMI I PLOTË
Edhe pse zgjedhjet parlamentare të parakohshme në Maqedoninë e Veriut do mbahen vetëm pas pak ditësh, një atmosferë sigurie dhe demokracie mbizotëron falë pjekurisë të lidershipit politik në tërësi, por edhe funksionimit normal të institucioneve.
Ndërsa fatkeqësisht te ne edhe pse nuk ka as datë zgjedhjesh ende në horizont kemi një tension artificial sikur zgjedhjet do jenë nesër.
Ndërkohë që edhe pandemia është në rritje së bashku edhe me defiçitin dhe borxhin publik. Verbëria për mbajtjen apo marrjen me çdo çmim të pushtetit na ka bërë që të dukemi me fqinjin tonë lindor sikur u përkasim dy kontinenteve të largëta.
Ndaj s’duhet humbur më asnjë minutë në përmbushjen e kushteve thelbësore për çeljen e negociatave në mënyrë që të ecim së bashku me fqinjët tanë drejt Bashkimit Europian.
Përballimi i pandemisë dhe plotësimi i kushteve duhet të jenë dy objektivat madhore për të gjithë.
E para mbron shëndetin dhe jetën e çdo qytetari, ndërsa e dyta shpëton të ardhmen europiane të vendit për të cilën të gjithë përbetohen me fjalë dhe programe.
Koha për vepra të mira është tani!
