Presidenti i Turqisë, Recep Tayyip Erdogan, ka zhvilluar një bisedë telefonike me presidentin e Iranit, Masoud Pezeshkian, ku është diskutuar për tensionet në rajon dhe incidentet e fundit që lidhen me hapësirën ajrore turke.
Gjatë bisedës, Erdogan theksoi se çdo shkelje e hapësirës ajrore të Turqisë është e papranueshme dhe nuk mund të justifikohet për asnjë arsye. Ai shtoi se Turqia do të vazhdojë të marrë të gjitha masat e nevojshme për t’iu përgjigjur incidenteve të tilla.
Nga ana e tij, presidenti iranian Pezeshkian deklaroi se raketat që dyshohet se kanë hyrë në hapësirën ajrore turke nuk ishin me origjinë iraniane dhe se do të zhvillohet një hetim i plotë për të përcaktuar burimin e incidentit.
Reagimet vijnë pasi mbrojtja ajrore e NATO-s neutralizoi një tjetër raketë balistike që kishte hyrë në hapësirën ajrore të Turqisë. Erdogan theksoi se sulmet ndaj vendeve fqinje nuk i shërbejnë askujt dhe duhet të ndalen menjëherë.
Presidenti turk nënvizoi gjithashtu rëndësinë e rihapjes së kanaleve diplomatike dhe tha se Turqia po punon për të mbështetur përpjekjet që synojnë uljen e tensioneve dhe dialogun në rajon. Ai shprehu edhe keqardhje për humbjen e jetëve civile gjatë konflikteve, duke iu referuar veçanërisht sulmit ndaj një shkolle në Minab.
Në fund të bisedës, Erdogan përsëriti ngushëllimet për ndarjen nga jeta të udhëheqësit suprem iranian, Ajatollah Ali Khamenei, dhe shprehu shpresën se zgjedhja e Mojtaba Khameneit si udhëheqës i ri suprem do të kontribuojë në paqen dhe stabilitetin në rajon.
