Presidenti i SHBA-së Donald Trump të shtunën u bëri presion vendeve të tjera që të vendosin anije luftarake për të garantuar sigurinë në Ngushticën e Hormuzit, një rrugë detare me rëndësi strategjike që është paralizuar për shkak të luftës së nisur nga SHBA-të dhe Izraeli kundër Iranit.
Duke pohuar se ushtria amerikane e ka “mposhtur dhe shkatërruar Iranin, si ushtarakisht ashtu edhe ekonomikisht”, presidenti amerikan u bëri thirrje gjithashtu vendeve që furnizohen me naftë të papërpunuar përmes Ngushticës së Hormuzit të garantojnë “sigurinë e kalimit të tij” duke dërguar anije luftarake dhe duke premtuar ndihmë nga ushtria e tij, nëpërmjet Truth Social.
“Shumë vende do të dërgojnë anije luftarake, në bashkëpunim me Shtetet e Bashkuara, për ta mbajtur ngushticën të hapur dhe të sigurt”, tha republikani. Vetëm një ditë më parë, ai kishte siguruar se, “shumë shpejt”, Marina Amerikane do të shoqëronte cisternat e naftës që kalonin nëpër ngushticë.
“Shpresojmë që Kina, Franca, Japonia, Koreja e Jugut, Britania dhe të tjerët do të dërgojnë anije në rajon në mënyrë që Ngushtica e Hormuzit të mos kërcënohet më nga një vend plotësisht i prerë”, shtoi ai.
