Udhëheqësi i ri suprem i Iranit, Mojtaba Khamenei, thuhet se është dërguar fshehurazi në Moskë për një operacion në këmbë pasi pësoi lëndime të rënda gjatë sulmeve ajrore, sipas raportimeve të medias së Kuvajtit “Al-Jarida”.
Raporti mbetet i pakonfirmuar nga burime zyrtare, por sipas gazetës, Khamenei u evakuua nga Irani në fshehtësi të plotë dhe u transportua në Rusi me një avion ushtarak rus.
Atje ai thuhet se iu nënshtrua një operacioni “të suksesshëm”, i cili sipas raportimit u organizua personalisht nga presidenti rus Vladimir Putin në një nga rezidencat presidenciale.
Gazeta citon një burim të paidentifikuar pranë udhëheqësit iranian, sipas të cilit Mojtaba Khamenei u plagos në një nga shpërthimet e para të operacionit ushtarak të quajtur Epic Fury.
Lëndimet e tij thuhet se kërkonin trajtim në një spital të specializuar, gjë që ishte e vështirë të sigurohej në Iran për shkak të sulmeve të vazhdueshme nga Shtetet e Bashkuara dhe Izraeli.
Sipas raportimeve të The Sun, djali 56-vjeçar i ish-udhëheqësit suprem Ali Khamenei mund të ketë humbur të paktën njërën këmbë dhe të ketë pësuar dëmtime serioze në stomak ose mëlçi gjatë sulmit ajror.
Ndërkohë, mungesa publike e Mojtaba Khamenei që nga emërimi i tij ka nxitur spekulime dhe thashetheme për gjendjen e tij shëndetësore, përfshirë pretendime të pakonfirmuara se ai mund të ketë vdekur.
Në një përpjekje për të kundërshtuar këto spekulime, televizioni shtetëror iranian transmetoi një deklaratë që pretendon se ishte mesazhi i tij i parë pas marrjes së pushtetit. Deklarata, e lexuar nga një prezantues lajmesh, paralajmëronte se Irani do të “hakmerret për gjakun e iranianëve” të vrarë dhe se do të vazhdojë sulmet kundër Dubait, si dhe bllokimin e Ngushticës së Hormuzit.
