Kryedemokrati Sali Berisha u është përgjigjur disa fermerëve të qarkut të Beratit që e kritikuan lidhur me përjashtimin e Ervin Salianjit nga PD, duke treguar arsyet e tij për këtë vendim.
Njëri prej fermerëve, teksa mori fjalën kritikoi Berishën për përjashtimin e Ervin Salianjit nga PD, duke theksuar se mendimi ndryshe nuk duhet të ‘vetëpërjashtohet’.
Në përgjigjen e tij, teksa tha se Salianji u vetëpërjashtua nga PD, Berisha deklaroi se ish-deputeti bashkëpunonte me kryeministrin Edi Rama dhe vartësit e tij.
Berisha deklaroi se në kohën që denonconte qeverinë dhe Ergys Agasin, Ervin Salianji drekonte me të dhe përdorte Suel Çelën për të mbledhur demokratët përmes kërcënimeve, në takimin që zhvilloi në Elbasan.
Fermeri: Jam një prej atyre që kanë formuar PD në zonë, dhe ne quhemi Parti Demokratike që ka demokraci brenda vetes, ne shikojmë se ju keni dalë me atë sloganin që dikush është vetpërjashtuar. Mendimi ndryshe nuk mendoj të jetë i vetpërjashtuar. Ne jemi pak të ndahemi dhe të përhapim konflikte brenda PD-së.
Berisha: Shtruat probleme për PD, shumë mirë. Një gjë të garantoj, që në themelim të saj dhe deri sa të jetë, do të jetë 100% e hapur për mendimin ndryshe, pa asnjë diskutim. Por, çdonjëri prej nesh duhet të dalloj mendimin ndryshe, nga qëndrimi ndryshe. Qëndrimi ndryshe pastaj është tjetër. Në ç’kuptim. I marrim me radhë. Në qoftë se ti në forumet e kësaj partie shtron çdo lloj mendimi absolutisht kurrë nuk do mund të ketë njëri pasojën më të vogël. Por nëse, bashkëpunon me kundërshtarin në mënyrë absolute, nuk do jesh më kurrë pjesë e kësaj partie. Pse e them këtë?
Pas zgjedhjeve, çdo ditë unë mbeta duke denoncuar farsën elektorale, çdo ditë informoja demokratët që analizë do bëjmë. Tani në qoftë se ti del dhe ditën e zgjedhjeve, ditën para zgjedhjeve bën thirrje që të votohet deputeti kundërshtar, ti besoj se je ndarë me këtë parti. Është kështu apo jo? Ky është qëndrim, nuk kemi të bëjmë me mendim ndryshe. Nëse ke mbajtur një post dhe ekspozohesh një javë rresht me deputetet kundërshtare, ke bere zgjedhjen tënde, nuk mund të thuash që jam në struktura. Ne qoftë se brenda katër orëve një TV publikon për ty nga zyra e Edi Ramës 16 lajme, që në katër orë nuk i bën dot njeri në Evrope, përveç ushtarit të Edi Ramës, ke marrë një rol të gabuar, nuk është roli që të përket.
Sepse është një keqpërdorim që i bën mediave Edi Rama për qëllime të veta. Absolutisht, asnjë njeri nuk do jetë kurrë, asnjë pasojë për mendimin ndryshe, por veprimi ndryshe është tjetër. Para se të dilte nga burgu më erdhi në zyrë dhe më kërkoi mendim. Më tha që për të dalë nga burgu këto 3 muaj duhet të firmos një dokument që nuk do vras Fatmir Xhafën. Gjykatësi kërkon garanci. I thash mos e firmos sepse pranon fajësinë dhe ti nuk ke patur asnjë sherr personal me të.
Tjetra unë sulmoja Ergys Agasin si një nga figurat më të zeza, ndërsa ai drekonte me të. Në Elbasan, më merrnin demokratët dhe më thoshin që i kërcënonte Suel Çela. Nuk mund të përdorësh Suel Çelën për të rreshtuar demorkatët pas vetes. Që në këtë moment i kam thënë je i vetpërjashtuar.
