Në dy javët e fundit të Kategorisë Superiore, beteja për mbijetesë është totalisht e hapur dhe, në aspektin matematikor, një nga më të ngushtat e viteve të fundit. Pesë skuadra Teuta, Tirana, Vora, Bylis dhe Flamurtari, ndahen nga vetëm tre pikë, ndërsa në lojë janë edhe gjashtë të tjera. Kjo do të thotë se çdo rezultat, qoftë fitore, barazim apo humbje, mund të ndryshojë rrënjësisht fatin e tyre. Struktura e renditjes e bën situatën edhe më dramatike. Vendet 6 dhe 7 sigurojnë mbijetesën direkte, vendi i 8-të shkon në “play out”, ndërsa vendet 9 dhe 10 bien nga kategoria. Me katër skuadra në kuotën e 38 pikëve dhe Flamurtarin në 35, diferencat janë minimale dhe skenarët të shumtë.

Teuta paraqitet si një nga skuadrat që kontrollon më shumë fatin e saj. Me një përballje direkte ndaj Flamurtarit dhe një tjetër ndaj një kundërshtari të fortë si Egnatia, çdo pikë ka peshë të dyfishtë. Matematikisht, nëse Teuta arrin të marrë katër pikë në këto dy ndeshje, pra një fitore dhe një barazim, ajo ngjitet në kuotën e 42 pikëve, një nivel që në shumicën e skenarëve garanton shpëtimin direkt. Edhe me tre pikë (41 në total), probabiliteti për të shmangur zonën e rënies mbetet i lartë, ndërsa çdo rezultat më i dobët e fut skuadrën në një zonë shumë të rrezikshme ku gjithçka varet nga rezultatet e rivalëve.

Situata e Tiranës është më e komplikuar për shkak të kalendarit. Përballjet me Vllazninë dhe Elbasanin, dy skuadra të kreut, e bëjnë më të vështirë arritjen e pikëve. Megjithatë, logjika matematikore mbetet e njëjtë, katër pikë do ta çonin Tiranën në një zonë relativisht të sigurt, ndërsa tre pikë e mbajnë në lojë, por pa garanci. Nëse bardheblutë marrin një ose zero pikë, rreziku për të rënë në vendet 9–10 bëhet shumë real.

Nga ana tjetër, Vora dhe Bylis janë të lidhura drejtpërdrejt nga përballja mes tyre në javën e fundit. Kjo ndeshje ka peshë të jashtëzakonshme, sepse praktikisht funksionon si një “play off” për mbijetesë. Për Vorën, një total prej katër pikësh në dy ndeshjet do të ishte thuajse i mjaftueshëm për shpëtim, ndërsa tre pikë e lënë në një zonë gri. Bylisi, që ka një ndeshje të vështirë ndaj Elbasanit përpara duelit direkt, është edhe më i ekspozuar: nëse nuk merr të paktën tre pikë në total, rrezikon seriozisht të përfundojë në zonën e rënies. Në fund, Flamurtari nis nga pozita më e dobët, me tre pikë më pak se rivalët.

Matematikisht, vetëm një maksimum prej katër apo gjashtë pikësh e mban realisht në garë për mbijetesë direkte. Një fitore dhe një barazim (39 pikë) mund ta çojnë në play-out, por edhe kjo varet nga dështimet e kundërshtarëve. Çdo rezultat më i dobët se kaq e afron ndjeshëm me rënien. Në përmbledhje, analiza matematikore tregon disa pragje të qarta: 42 pikë janë praktikisht të sigurta për mbijetesë, 40–41 pikë zakonisht mjaftojnë, ndërsa 38–39 pikë përfaqësojnë zonën më të rrezikshme ku çdo detaj vendos fatin. Dy ndeshje direkte, përballja mes Flamurtarit dhe Teutës, si dhe ajo mes Vorës dhe Bylisit, janë nyjet kryesore të gjithë këtij ekuacioni, sepse aty jo vetëm fitohen pikë, por hiqen drejtpërdrejtë.