Ndërsa familjet dhe bizneset në mbarë botën po përballen me rritjen e kostove si pasojë e luftës mes SHBA-së, Izraelit dhe Iranit, disa prej kompanive më të mëdha ndërkombëtare po raportojnë fitime rekord, raporton BBC.

Paqëndrueshmëria në tregje dhe bllokimi efektiv i Ngushticës së Hormuzit nga Irani kanë shkaktuar luhatje të forta në çmimet e energjisë, duke ndikuar në ekonominë globale. Megjithatë, sektorë të caktuar kanë përfituar miliarda dollarë nga situata.

Nafta dhe gazi

Sektori që ka përfituar më shumë nga konflikti është ai i energjisë. Rreth një e pesta e naftës dhe gazit në botë transportohet përmes Ngushticës së Hormuzit, por dërgesat janë ndërprerë ndjeshëm që nga fundi i shkurtit.

Gjigantët europianë të naftës kanë raportuar rritje të forta të fitimeve. BP më shumë se dyfishoi fitimet në tremujorin e parë të vitit, duke arritur në 3.2 miliardë dollarë. Shell raportoi fitime prej 6.92 miliardë dollarësh, ndërsa TotalEnergies shënoi një rritje me gati një të tretën, në 5.4 miliardë dollarë.

Edhe kompanitë amerikane ExxonMobil dhe Chevron tejkaluan pritshmëritë e analistëve dhe presin rritje të mëtejshme të fitimeve gjatë vitit.

Bankat e mëdha

Fitime të konsiderueshme kanë regjistruar edhe bankat më të mëdha amerikane, falë rritjes së tregtimit në tregjet financiare.

JP Morgan raportoi të ardhura rekord prej 11.6 miliardë dollarësh nga divizioni i tregtimit vetëm në tre muajt e parë të vitit 2026. Ndërkohë, bankat e tjera të mëdha si Bank of America, Morgan Stanley, Citigroup, Goldman Sachs dhe Wells Fargo raportuan gjithashtu rritje të ndjeshme të fitimeve.

Në total, gjashtë bankat më të mëdha amerikane realizuan 47.7 miliardë dollarë fitime gjatë tremujorit të parë të vitit.

Mbrojtja dhe industria ushtarake

Konflikti ka rritur ndjeshëm kërkesën për armë, sisteme mbrojtjeje ajrore dhe pajisje ushtarake.

BAE Systems deklaroi se pret rritje të fortë të shitjeve dhe fitimeve gjatë vitit, duke përmendur shtimin e kërcënimeve globale dhe rritjen e shpenzimeve ushtarake nga qeveritë.

Gjigantët amerikanë Lockheed Martin, Boeing dhe Northrop Grumman raportuan porosi rekord në fund të tremujorit të parë të 2026-ës.

Energjia e rinovueshme

Lufta ka nxitur gjithashtu interesin për energjinë e rinovueshme dhe uljen e varësisë nga karburantet fosile.

Kompania amerikane NextEra Energy ka parë rritje të fortë të aksioneve këtë vit, ndërsa kompanitë daneze të energjisë së erës Vestas dhe Orsted raportuan fitime në rritje.

Në Britani, Octopus Energy tha se konflikti ka shkaktuar një rritje të madhe të kërkesës për panele diellore dhe pompa termike, me shitjet e paneleve që janë rritur me 50% që nga fundi i shkurtit.

Rritja e çmimeve të karburanteve ka shtuar gjithashtu interesin për automjetet elektrike, ku prodhuesit kinezë po përfitojnë ndjeshëm nga situata.