Edhe kur shtëpia duket e pastër dhe e rregullt, disa detaje të vogla mund ta bëjnë hapësirën të duket e ngarkuar dhe e lodhshme për syrin. Ekspertët e dekorit e quajnë këtë “zhurmë vizuale”, një ndjesi që krijohet kur ka shumë objekte në pamje dhe ambienti humb qetësinë.
Sipas specialistëve, nuk është e nevojshme të bëhen ndryshime të mëdha në mobilim apo dekor. Në shumë raste, mjafton të hiqen ose të organizohen disa sende të përditshme që hapësira të duket më e hapur dhe më e rregullt.
Një nga shkaqet kryesore është mbushja e sipërfaqeve me objekte të ndryshme, si banakët e kuzhinës, tavolinat apo komodinat. Kur aty vendosen shumë sende, syri lodhet dhe krijohet ndjesi rrëmuje, edhe nëse gjithçka është e vendosur në vendin e vet.
Zgjidhja është mbajtja jashtë vetëm e objekteve që përdoren çdo ditë, ndërsa pjesa tjetër mund të ruhet në sirtarë ose kuti organizuese. Edhe përdorimi i një tabakaje të thjeshtë ndihmon që sendet të duken më të sistemuara.
Një tjetër problem i zakonshëm janë kabllot dhe karikuesit e shpërndarë nëpër shtëpi, që shpesh krijojnë rrëmujë vizuale. Organizimi i tyre në një vend të vetëm e bën hapësirën të duket më e pastër.
Po ashtu, edhe frigoriferi i mbushur me magnete dhe shënime mund të japë përshtypjen e rrëmujës në kuzhinë. E njëjta gjë vlen për koleksionet e shumta dekorative apo kornizat në mure, të cilat kur janë të tepruara e rëndojnë ambientin.
Edhe banjoja ndikohet lehtë nga ky efekt, sidomos kur produktet e kujdesit personal lihen të shpërndara në sipërfaqe. Vendosja e tyre në një tabaka dhe mbajtja vetëm e gjërave të domosdoshme e bën hapësirën më të rregullt.
Në përgjithësi, një shtëpi më e qetë vizualisht nuk lidhet me minimalizëm ekstrem, por me organizim të thjeshtë dhe heqjen e elementeve të tepërta që krijojnë ngarkesë në pamje.
