Një tragjedi familjare ka tronditur qytetin El Ejido në Spanjë, ku një sulm me armë zjarri la të vdekur dy persona dhe plagosi katër të tjerë, mes tyre edhe fëmijë të mitur.
Ngjarja ndodhi mbrëmjen e së hënës në zonën El Canalillo, duke shkaktuar panik mes banorëve lokalë. Forcat e policisë dhe ekipet e emergjencës mbërritën menjëherë në vendngjarje, por gjetën dy viktimat pa shenja jete. Viktimat janë identifikuar si prindërit e autorit të dyshuar.
Sipas autoriteteve, katër persona të tjerë mbetën të plagosur rëndë, mes tyre edhe dy fëmijë të mitur. Një nga fëmijët e plagosur në sulm besohet të jetë djali shtatëmuajsh i të dyshuarit dhe tjetri një foshnjë 18 muajshe, sipas raporteve lokale. Autoritetet nuk kanë publikuar zyrtarisht identitetin e të dyshuarit dhe viktimave.
Policia spanjolle bëri të ditur se i dyshuari, një 25-vjeçar, u largua nga vendi i ngjarjes menjëherë pas sulmit, por u arrestua disa orë më vonë gjatë një operacioni të organizuar nga njësitë speciale të Guardia Civil.
Burime pranë hetimit raportojnë se i riu dyshohet të ketë përdorur një armë zjarri pa leje, ndërsa autoritetet po punojnë për të zbardhur mënyrën se si ai e siguroi armën.
Katër të plagosurit u transportuan me urgjencë drejt spitaleve të zonës së Almerias, ku ndodhen nën kujdes intensiv mjekësor. Mediat lokale raportojnë se një prej të plagosurve ndodhet në gjendje kritike pas një ndërhyrjeje kirurgjikale, ndërsa dy nga viktimat e plagosura janë fëmijë të vegjël.
Autoritetet shëndetësore nuk kanë dhënë ende detaje të plota mbi gjendjen e tyre, por konfirmojnë se situata mbetet serioze.
Ngjarja ka shkaktuar reagime të forta në opinionin publik në Spanjë, një vend ku sulmet me armë zjarri konsiderohen të rralla për shkak të ligjeve të ashpra mbi armëmbajtjen.
Hetuesit po vijojnë punën për të përcaktuar motivin e plotë të sulmit dhe rrethanat që çuan në këtë tragjedi familjare, ndërsa zona ku ndodhi ngjarja mbetet nën mbikëqyrje të shtuar policore.
