PSG ka fituar për të dytin edicion radhazi Ligën e Kampioneve, duke mundur këtë radhë në finale Arsenalin pas dramës së penalltive në stadiumin “Pushkash Arena” të Budapestit mbrëmjen e sotme (30 maj).
Ndryshe nga finalja e një viti më parë, francezët kanë vuajtur, pasi pësuan shpejt gol nga anglezët të cilët u mbyllën në mbrojtje duke mos i lënë t’u afrohen portës së tyre.
Megjithatë, dyshja Kvara-Dembele ia doli që të barazonte shifrat falë një penalltie të siguruar nga gjeorgjiani në pjesën e dytë dhe aty ndeshja u hap disi, por me ekipin francez gjithnjë në kontroll.
90 minutat u mbyllën pa gola të tjerë, ashtu si edhe shtesat, ndaj u desh gjuajtja nga pika e bardhë që të përcaktonte fituesin.
Aty u treguan më të saktë parisienët, edhe pse Mendes pa gjuajtjen e tij të pritej nga Raja, pasi Eze dhe Gabriel dërguan tentativat e tyre jashtë, duke i dorëzuar trofeun kësisoj PSG-së për të dytin vit radhazi.
Për PSG-në ishte mundësia që të konfirmohej si një nga skuadrat më të forta në historinë e turneut, duke e fituar dy edicione radhazi atë.
Ndërsa për anglezët, ky ishte shansi i artë për të treguar se brezi aktual është më i miri që kanë pasur “topçinjtë” duke ia kaluar edhe skuadrës legjendare të Venger.
Luis Enrike e nisi ndeshjen me formacionin e zakonshëm sulmues, pasi Kvaratskhelia, Due dhe Dembele e nisin nga minuta e parë sfidën.
