Moshën e tretë, dalja në pension nuk e pengon që të vijojnë të sigurojnë të kenë një ekonomi më të mirë. INSTAT nxjerr në pah një fenomen të ri. Tani më tregu I punës po dominohet nga pensionistët aktivë, sesa nga të rinjtë.
Gjatë periudhës 2019-2025 numri i pensionistëve aktivë në tregun e punës është rritur me rreth 177 mijë persona, ndërsa në të njëjtën kohë janë larguar rreth 144 mijë të rinj deri në moshën 29 vjeç.
Vështirësia e bizneseve për të gjetur punonjës të rinj, disa të moshuar I ka detyruar të vijojnë të jenë pjesë e tregut të punës, e të tjerë e kanë kthyer në zgjedhje personale. Ndërkohë një faktor tjetër janë dhe pensionet e ulëta. Aktualisht, në skemën e sigurimeve shoqërore përfitojnë rreth 730 mijë pensionistë dhe çdo vit këtij numri i shtohen mesatarisht 15 mijë pensionistë të rinj.
Nga ana tjetër, grupmoshat e reja po pakësohen për shkak të emigracionit dhe rënies së lindshmërisë. Kjo po krijon një boshllëk në tregun e punës, sidomos në sektorët e prodhimit, ndërtimit, turizmit dhe shërbimeve, ku bizneset raportojnë vështirësi në gjetjen e stafit.
Më pak të rinj në punë do të thotë më pak kontribute për sigurimet shoqërore, ndërsa numri i përfituesve të pensioneve vijon të rritet. Për të përballuar mungesën e fuqisë punëtore, vitet e fundit bizneset shqiptare janë orientuar gjithnjë e më shumë drejt punësimit të shtetasve të huaj, kryesisht nga Azia dhe vendet e rajonit.
