Kryeministri britanik në largim, Keir Starmer, mbajti një fjalim emocionues lamtumire në Dhomën e Komunave, duke konfirmuar se po i jep fund karrierës së tij politike.
Gjatë paraqitjes së tij të fundit në Sesionin e Pyetjeve të Kryeministrit, Starmer falënderoi deputeten laburiste Carolyn Harris për mbështetjen dhe miqësinë e vazhdueshme ndaj tij dhe familjes së tij.
“Çdo kryeministër e di se, kur merr pishtarin, një ditë do t’ia dorëzojë dikujt tjetër. Ajo ditë ka ardhur për mua. Ky është fundi i udhëtimit tim politik,” u shpreh ai.
Starmer theksoi se e udhëhoqi Partinë Laburiste nga humbja historike në zgjedhjet e vitit 2019 drejt fitores historike në vitin 2024, ndërsa vlerësoi se pas dy vitesh në qeveri e lë vendin “në një gjendje më të mirë nga sa e gjeti”.
“Jam krenar për gjithçka që kemi arritur,” deklaroi ai, duke falënderuar ekipin e tij politik, deputetët laburistë dhe nëpunësit civilë për kontributin e tyre.
Në fund të fjalimit, Starmer premtoi mbështetje për qeverinë e ardhshme dhe përcolli një mesazh prekës për familjen e tij.
“Për të gjithë ata që kanë përfituar nga kjo qeveri dhe për ata që shpesh nuk dëgjohen, ju jeni arsyeja pse hyra në politikë. Gruaja dhe fëmijët e mi, ju dua. Mirupafshim,” përfundoi ai.
