Arabia Saudite, Turqia dhe Pakistani kanë nënshkruar një marrëveshje të përbashkët mbrojtjeje, duke deklaruar se çdo sulm ndaj njërës prej tyre do të konsiderohet si sulm ndaj të tre shteteve.
Pakti, i quajtur “Marrëveshja e Përbashkët e Mbrojtjes e Mekës”, u shpall pas një takimi në Mekë mes Princit të Kurorës së Arabisë Saudite, Mohammed bin Salman, presidentit turk Recep Tayyip Erdogan dhe kryeministrit pakistanez Shehbaz Sharif.
Sipas Ministrisë së Jashtme të Pakistanit, tre vendet angazhohen për mbështetje të ndërsjellë në rast se njëri prej tyre sulmohet. Megjithatë, marrëveshja nuk specifikon detyrimet konkrete që do të ketë secili shtet në një situatë të tillë.
Një zyrtar turk, i cituar nga Reuters, theksoi se pakti është “thjesht mbrojtës në natyrë”.
Nënshkrimi i marrëveshjes vjen në një kohë tensionesh të larta në Lindjen e Mesme. Lufta mes SHBA-së dhe Iranit ka përfshirë edhe Arabinë Saudite dhe ka shkaktuar ndërprerje të lundrimit në Ngushticën e Hormuzit dhe Detin e Kuq.
Pas sulmeve të SHBA-ve dhe Izraelit ndaj Iranit më 28 shkurt, Teherani dhe aleatët e tij kanë ndërmarrë sulme ndaj objektivave saudite dhe vendeve të tjera të Gjirit, ndërsa rebelët Houthi në Jemen kanë shpallur një “embargo detare” ndaj Arabisë Saudite dhe kanë goditur aeroporte, objekte nafte dhe anije cisternë në Detin e Kuq.
Në përgjigje, Arabia Saudite ka intensifikuar operacionet ushtarake kundër pozicioneve të Houthive dhe ka krijuar një koalicion të ri detar për mbrojtjen e lundrimit në Detin e Kuq dhe Gjirin e Adenit.
Tre vendet kanë theksuar se marrëveshja synon forcimin e bashkëpunimit përballë përshkallëzimit të konfliktit mes Izraelit dhe Iranit dhe rreziqeve në rritje për sigurinë rajonale.
Arabia Saudite është një nga fuqitë më të mëdha financiare dhe ndër blerësit kryesorë të armëve në botë, Turqia zotëron forcën e dytë më të madhe ushtarake në NATO dhe një industri të zhvilluar të mbrojtjes, ndërsa Pakistani është një fuqi bërthamore.
