Agjencitë antikorrupsion të Ukrainës kanë nisur një operacion të posaçëm ndaj një organizate të dyshuar kriminale, në një hetim që përfshin edhe zyrtarë të lartë të Zyrës së Presidentit Volodymyr Zelensky.
Byroja Kombëtare Antikorrupsion e Ukrainës (NABU) dhe Prokuroria Speciale Antikorrupsion (SAPO) njoftuan të mërkurën se po hetojnë një organizatë kriminale që dyshohet se drejtohet nga një deputet aktual dhe një ish-deputet dhe ku mund të jenë përfshirë edhe zyrtarë të lartë të Zyrës së Presidentit.
Sipas raportimeve të Kyiv Independent, hetuesit kanë kryer kontrolle në ambientet e deputetit ukrainas Vadym Stolar dhe të Iryna Mudras, zëvendësdrejtuese e Zyrës së Presidentit. Deri tani, autoritetet nuk kanë bërë të ditura detajet e plota të veprave penale që po hetohen dhe as rolin e secilit prej personave të përfshirë.
