Ish-drejtuesja e kanalit shtetëror rus Russia Today, Xenia Fedorova, do të rikthehet në ekranet franceze si komentatore, pavarësisht dëbimit të saj nga Franca dhe akuzave për përhapje të propagandës pro-Kremlin.
Fedorova, e cila tashmë është pjesë e kanalit televiziv CNews, në pronësi të miliarderit Vincent Bolloré, do të shfaqet në transmetim përmes videokonferencës, duke e anashkaluar ndalimin për të hyrë në Francë.
Lajmi ka shkaktuar reagime në qeverinë franceze. Ministri i Jashtëm, Jean-Noël Barrot, tha se ishte “shumë i befasuar” dhe “zemërthyer” që grupe të mëdha mediatike po u hapin studiot dhe hapësirat e tyre personave që, sipas tij, janë dëbuar me të drejtë nga Franca.
Barrot e akuzoi Fedorovën se ka vepruar si një “agjente propagande e Kremlinit” dhe tha se autoritetet franceze e kanë dëbuar atë pas akuzave për përfshirje në fushata dezinformimi të orkestruara nga Rusia, me synim destabilizimin e rendit publik në Francë.
Urdhri për dëbimin e Fedorovës u dha në fund të korrikut, pas muajsh polemikash lidhur me deklaratat dhe paraqitjet e saj publike në mbështetje të politikave të Vladimir Putinit. Autoritetet franceze vendosën gjithashtu ngrirjen e llogarive dhe aseteve të saj për gjashtë muaj.
Megjithatë, ndalimi i hyrjes në territorin francez nuk e pengon atë të marrë pjesë në programe televizive nga distanca. Prezantuesi i CNews, Gauthier Le Bret, konfirmoi se Fedorova do të rikthehet në ekran përmes videolidhjes për të ofruar komentet dhe analizat e saj.
Rikthimi i saj në median e kontrolluar nga Bolloré ka ngritur shqetësime në Francë për ndikimin e mundshëm në debatin publik, veçanërisht përpara zgjedhjeve presidenciale të vitit 2027.
“Pse të hapen studiot, të vihen në dispozicion rubrikat e gazetave dhe t’i jepen kohë mediatike dikujt që është provuar se po punon në shërbim të Rusisë kundër Francës dhe Bashkimit Evropian?”, pyeti ministri Barrot.
