Në mesin e 23 personave, mbetjet mortore të të cilëve janë zhvarrosur së fundmi në Mitrovicë, janë identifikuar edhe tre veprimtarë të njohur të çështjes kombëtare: Adem Beqiri, Idriz Rrecaj dhe Salih Meziu.
Mediat në Kosovë, shkruajnë se Adem Beqiri ishte nga Mitrovica, ndërsa Idriz Rrecaj dhe Salih Meziu nga Skenderaj.
Identifikimi i tyre është konfirmuar nga Instituti i Mjekësisë Ligjore, pas përfundimit të procedurave për përcaktimin e identitetit.
Mbetjet mortore të 23 personave u zhvarrosën në kuadër të përpjekjeve për zbardhjen e fatit të personave të zhdukur.
Identifikimi i tre veprimtarëve përbën një zhvillim të rëndësishëm për familjet e tyre, të cilat kanë pritur prej vitesh për të mësuar fatin e të afërmve të tyre.
Zhvarrosja dhe procesi i identifikimit janë pjesë e përpjekjeve institucionale për të zbardhur rastet e personave ende të pagjetur dhe për t’i kthyer mbetjet mortore familjeve, duke u dhënë atyre mundësinë për t’i përcjellë të afërmit në banesën e fundit.
